5 Baatein Jinke Baare Mein Tumhein Lady Doctor Se Online Consultation Leni Chahiye

blog8coverchaajaa.jpg


Hi!

Aaj iss blog mein hum lady doctor aur unke paas kyun jaana chahiye - is baare mein baat karenge. But chalo, usse pehle baat karte hain lady doctors ke baare mein, woh kaun hain? Aur humaari help kaise kar sakte hain?

Lady doctor/ladies problem doctor ya gynecologist, woh doctors hain jo female reproductive system, aur private parts ke baare mein expert hote hain. Khud ko safe aur healthy rakhne ke liye in experts se consult karna bahut zaroori hota hai. Humaarireproductive health aur private parts ki health humaari overall health acchi hone ke liye important hai. Jab humein fever hota hai ya koi aur problem hoti hai, tab hum bina kisi hichkichahat ke pahunch jaate hain doctor ke pass, waise hi agar humaare private parts mein koi problem ho toh humein jald se jald lady doctor ke paas jaana chahiye.

Lady gynecologist tumhaare periods se jude sawaal jaise ki periods mein kya nahi karna chahiye ya periods jaldi aane ke upay kya ho sakte hain ka sahi jawaab tumhein degi aur uske saath saath agar tumhare sex ke baarein mein sawaal hain toh unka bhi sahi jawaab degi.

Pehli baar ek lady gynecologist ke paas jaana aur consultation lena bahut scary lag sakta hai par hum ladkiyaan bhi toh kitni brave aur strong hain! Haan, pehli baar ek lady doctor se baat karna thoda awkward zaroor lag sakta hai par lady doctor saari prblems ka sahi solution bhi toh degi - isiliye jaana zaroori hai.

blog8_1.jpg


5 baatein jinke liye lady doctor se consult karna chahiye

Jab baat humaari sexual aur reproductive health par aati hai toh ye jaan paana difficult ho jaata hai ki kya normal hai kya nahi, ya ek health problem ke kya signs ho sakte hain? Aksar hum apni private problems lady doctor se share karne mein embarrassed feel karte hain but humaara khul ke apni problems ko ek lady gynecologist se share karna zaroori hai taaki humaari problem theek ho sake aur hum healthy reh sake.

Lady doctor woh experts hai jo tumhaari private problems solve kar sakte hain aur tumhaari help kar sakte hain. Lady doctor ke paas bahot dikkat ho tabhi jaana zaroori nahi hai. Tum khud ko safe aur healthy rakhne ke liye regular check ups ke liye bhi lady gynecologist ke paas jaa sakti ho, aisa karne se tumhein tumhari body ke chhote se chhote change ke baare mein bhi pata chalta hai.

Ab baat karte hain ki kin kin baaton ke liye lady doctor ke paas jaana zaroori hai:

Period se jude problems

Har kisi ko apne periods ke baare mein poori aur sahi information pata honi chahiye taaki kisi bhi change ko notice karne mein aasaani ho. Periods ke normally na hone par, flow zyaada ya kam hone par, period mein pet dard zyaada hone par - in sab ke time doctor ke paas jaana bahot zaroori hai. Period ke waqt zyaada pain endometriosis ya uterus mein fibroids ke kaaran ho sakta hai, irregular periods PCOS ya PCOD ki vajah se ho sakte hain - aur in problems ke baare mein doctor hi sahi se bata sakte hain.

In problems ke baare mein lady doctor se khul ke baat karne se tumhaari health jald hi theek bhi hogi aur koi severe condition bhi nahi hogi, tum apni problems jitni detail mein aur sacchaai ke saath bataaogi utna hi jaldi tumhaari problem ka solution hoga.

bloh8_2.jpg


Breasts mein gaanth mehsoos hona

Regular breast exam karna aur khud se bhi apni breast ko check karna bahot hi important hain, especially agar tumhaari family mein breast cancer ki history hai. Diagnosis jaldi hone se problem bhi jaldi solve ho jaayegi, vo bhi bina kisi complication ke. Agar tum apni periods ke time breast mein koi discomfort feel karti ho ya breasts mein koi gaanth mehsoos karti ho, toh jald se jald ek lady doctor se consult karo.

Abnormal discharge

Vaginal discharge humaari body ka bahut hi natural process hai jisse humaari vagina apne aap ko healthy aur clean rakhti hai. Vaginal fluids humaari vagina se bacteria aur dead cells ko bahar nikalte hain taaki hum healthy reh sake bina kisi infection ke.

Jo vaginal discharge white colour ka hota hai aur thoda sa thick hota hai woh normal discharge hota hai. But agar tumhein is discharge ke saath saath itching, rashes ya discomfort feel hota hai toh tumhein lady doctor se consult karna chahiye kyunki ye infection ke signs ho sakte hain.

Abnormal discharge aksar yellow ya green colour ka hota hai, but zaroori nahi hai ki abnormal discharge hamesha inhi colours ka ho, kabhi kabhaar brown ya white discharge bhi infection ka sign ho sakta hai.

Chahe tumhaare discharge ka colour kaisa bhi ho, agar tum uske saath vaginal itching, vagina pe rashes aur discomfort feel kar rahi ho, aur ek gandi odour se deal kar rahi ho toh ye infection ho sakta hain, isliye tumhein jald hi apni lady gynecologist se consult karna chahiye.

blog8_3.jpg


STIs/STDs

Sexually Transmitted Infections (STI’s) aur Sexually Transmitted Disease (STD’s) dono hi safe sex practice naa karne ki wajah se ho sakte hain. Jab tum kisi already infected person ke saath skin-to-skin contact mein aate ho, toh tumhaari body ke fluids exchange hone se ye infection ya disease tumhein bhi hone ka khatra rehta hai.

Agar tum neeche diye hui list mein se koi bhi symptoms experience kar rahi ho, toh tumhein jald hi ek achi lady doctor se consult karna chahiye:

  • Urinate karte time pain ya jalan mehsoos karna
  • Vagina ya muh par daane ya rashes hona
  • Vagina mein se unusual bleeding hona
  • Fever
  • Sex ke time pain feel karna
  • Unusual ya bahut smell karne waala vaginal discharge hona
  • Lower abdomen mein pain hona

Kya tumhein pata hai tum STIs/STDs hona prevent kar sakti ho? Woh kaise?

Safe sex practice karke! Safe sex sirf sirf pregnancy bachne ke liye hi nahi, but khud ko aise infections se bachaane ke liye bhi zaroori hai. Humesha condom use karo, kyunki sirf condom hi ek aisa contraceptive yaani garbh nirodh ka tareeka hai jo tumhein pregnancy ke saath saath aisi dangerous aur painful bimariyon se bhi bachaata hai.

blog8_5.jpg


Sex ke time par pain hona

Agar tum sex ke time in dono mein se kisi bhi tarah ka pain ya discomfort feel karti ho, toh ek lady doctor se baat karna bahut zaroori hain:

  • Vaginal dryness
  • Painful sex

Sex pleasurable hona chahiye painful nahi. Agar tum painful sex experience kar rahi ho toh jald hi lady gynecoologist se consult karna chahiye. Pain ka cause physical (jaise prepared na hona, ya lube use na karna) bhi ho sakta hai, aur psychological (jaise comfortable na feel karna ya kisi buri memory ka yaad aana) bhi. Aur is situation se bahar aane mein ek bharosemand lady doctor tumhaari help kar paayegi, tumhein sahi salahde kar. Ab sex ke baarein mein sawaal lady doctor se nahi poochoge toh kis se poochoge?




Conclusion:

Lady doctor se consult aur khul ke baat karna zaroori hai taaki hum ek overall healthy life experience kar sake, kyonki humaare private parts ki health bahot hi important factor hai acchi overall health ke liye.

Ek lady doctor ko apna khaas dost samjho, jo tumhari private problems ke jhatt se solutions nikaal degi, tumhein comfortable bhi feel karwaayegi, aur tumhari personal baatein tum dono ke beech hi rakhegi. Gynecologist se salaah lena aur informed rehna tumhein kisi bhi reproductive ya vaginal health problem hone se bacha sakta hai.

Toh phir dil khol ke apne personal problems ka solution dhundo ek expert se consult kar ke. Bas phir, bina kisi hichkichahat ke online lady doctor se consult karo aur khud ko smart, brave, healthy aur strong banao! Yaad hai naa? Chhaa Jaa ke sath no sharmana aur no ghabrana!