Humare Private Parts Mein Itching Kyon Hoti Hai? Hum Apne Private Parts Ko Clean Kaise Rakhein?

Hello!

Aaj hum discuss karne wale hai humaare private parts ke baare mein. Specifically, hum discuss karenge ki humaare private parts mein itching kyon hoti hai. Apne private parts ki health ke baare mein baat karna bahot zaroori hai kyonki yeh problem bahot ladkiyaan face karti hain lekin koi bhi khul ke is baare mein baat nahi karta aur aksar embarrassed feel karte hain. Jhijhakna ya embarrassed feel karna vaise toh normal hai kyonki humein bachpan se hi kabhi in topics ke baare mein baat karne ki aadat nahi hai, kabhi humse is baare mein khul ke baat nahi ki jaati hai, lekin apne private parts ki health ke baare mein sawaal poochna zaroori hai aur normal bhi aur ye ek smart, Chhaa Jaa girl ki pehchan hai.

Dekho, kisi bhi issue ko solve karne ke liye pehle uske reason samajhna zaroori hai aur aaj hum wahi karne waale hain. Is blog mein hum baat karenge private parts mein hone wali itching ke baare mein, iske hone ke kaaran, symptoms, aur aakhir mein is problem se deal karne ke tareeke. In topics ke baare mein jaanana zaroori isliye hai kyonki private parts mein itching tumhare vagina se judi kisi aur problem ka signho sakti hai.

Agar tumhein private parts mein itching, burning ya irritation mehsoos ho rahi hai toh best hai ki tum ek lady doctor se consult karo. Woh tumhe ek proper diagnosis de paayengi aur tumhare saare questions ka sahi jawaab bhi dengi. Lady doctor ke paas jaane se tumhari baat private bhi rahegi aur tum apni body ke baare mein trust ke saath, safety ke saath, bina kisi sharam ya embarrassment ke jaan paaogi. Lady doctor ke paas jaane mein tumhein embarrassed feel karne ki koi zaroorat nahi hai. Jaise tum fever hone pe doctor ke paas jaati ho waise hi zaroorat padne par lady doctor ke paas jaana samajhdaari ka kaam hai.

Private Parts Mein Itching Kyon Hoti hai?

Humari body pe kahi bhi itching hone par hum uncomfortable feel karte hain but jab ye itching humaare private parts mein ho, toh discomfort bahot zyada mehsoos hota hai. Private parts mein itching hone se kaafi confusion bhi hoti hai ki iske reasons kya ho sakte hain. Kaafi baar itching ke saath saath vaginal discharge bhi rehta hai jiska colour ya smell thoda off hota hai but haan, aisa har kisi case mein nahi hota. Itching sensation discharge ke bina bhi feel ho sakti hai.

Private parts mein itching hone ke kai reasons ho sakte hain, jaise ki:

Yeast infection:

Yeh infection tab hota hai jab private parts yanni vagina aur vulva mein yeast excess mein grow karne lagti hai. Iske reason pregnancy, sex, medication ya weak immunity mein se kuch bhi ho sakta hai aur yeast infection hone pe ek thick, cheesy consistency ka white discharge bhi nikalta hai.

Bacterial vaginosis:

Humaari vagina mein bacteria rehna normal hai, har bacteria necessarily bura nahi hota hai. Lekin agar vagina mein galat tarah ka bacteria grow karne lage yaa bacteria zyaada grow ho jaaye, toh infection ke chances badh jate hai. Bacterial Vaginosis hone pe tumhare private parts aur vulva ke aas paas inflammation yaani redness, itching, aur burning yaani jalan jaisa feel hota hai aur smelly discharge bhi nikalta hai.

UTI:

Urinary tract infection (UTI) tab hota hai jab humaare urinary tract mein body ke baahar se foreign particles ghus ke infection kar dete hain. Itching ke saath UTI hone pe urinate karte samay bhi ek burning sensation yaani jalan saa feel hota hai, aur urine se smell aati hai.

Wax ya shaving:

Hair removal se tumhari private parts ki skin irritated aur red si ho jaati hai. Agar aisa tumhare saath har baar ho raha hai toh completely hair removal matt karo kyonki priivate areas waale pubic hair tumhein kai bacteria se protect karta hai, tum sirf hair trim karke apni vaginal health maintain kar sakti ho.

Eczema ya psoriasis:

Yeh dono hi skin conditions hain jo ke allergy ya weak immunity ki wajah se trigger hoti hai. Iski treatment oral medication ya prescription lotion aur creams se hi hoti hai, agar tumhein aisa lag raha hai ki tumhein yeh condition hai toh tumhein ek lady doctor se consult kar ke confirm kar lena chahiye woh tumhein iski treatment ke liye ek dermatologist se connect kar sakti hai.

STDIs/STIs:

STDIs aur STIs ke symptoms mein se itching aur irritation ek hai. Kai baar agar STIs ki wajah se itching hoti hai toh private parts mein rashes, bumps ya warts bhi rehte hain.

Skin irritation - sweat, tight clothing, intimate wash:

Humaareprivate parts ki skin bahot sensitive hoti hai aur skin ko khuli air mein breath karne ki bahot zaroorat hoti hai. Isliye zaroori hai ki tum aise kapde pehne jo tumhaare private parts mein hawa lagne de. Aur toh aur koi bhi scented product jese ki intimate washes ya regular body wash apne private parts se dur rakhna hi better hai kyonki i products mein chemicals ki vajah se sensitive skin inflame ho jati hai.

Tension mat lo, itching ki problem kaafi common hai aur iske kai reasons ho sakte hain. Sabse accha solution hoga ki tum ek online lady doctor se consult karo kyonki woh tumhein exact diagnosis de paayengi aur treatment bhi de paayengi.

Private Parts Ka Khayal Kaise Rakhein?

Agar tumhein lag raha hai ki itching ki problem khatam nahi ho rahi hai, toh best hai ki tum online lady doctor ko consult karo kyuki yeh kisi underlying condition ki vajah se bhi ho sakti hai. Neeche diye hue kuch tips tumhein apne private parts ka khayaal rakhne mein help karenge.

Hygiene:

Vagina waise toh ek self cleaning organ hai jo apne aap khud ko saaf kar leti hai lekin phir bhi apne private parts ki hygiene maintain karna bahot zaroori hai. Bass regularly normal paani se apne private parts ko saaf karo. Aur haan, intimate washes aur scented soaps ko avoid karo.

Loose kapde:

Tight kapde pehenane se humaari skin breathe nahi kar paati jo ki vagina jaise sensitive area ke liye bahot zaroori hai. Loose kapde pehenane se private parts mein friction nahi hoti jisse itching aur irritation door rehta hai. Cotton undergarments use karne se sweat kapde mein trap nahi hota aur skin pe koi irritation bhi nahi hoti. Apne undergarments ko regularly wash bhi karna chahiye aur dhoop mein sukhana chahiye taaki koi bacteria ya infection hone ke chances kamm ho jaaye.

Safe sex:

Safe sex practice karne se hum STIs aur STDIs se bach sakte hain. Isliye physical hote samay humesha condoms use karna chahiye.

Regular check-ups:

Apni body ko healthy rakhne ke liye zaroori hai ki hum apni body ko samay samay par regularly check karein. Regular check-ups se problem samay rehte pata chal jaati hai, aur isse easily address karne mein help milti hai.

Change pads regularly:

Periods ke time private parts mein infections hone ke chances badh jaate hain, especially agar pads ko regularly change naa karein. Saath hi, agar tum menstrual cups ya tampon use karti ho, tab bhi unhein timely change karte rehna chahiye.

HPV vaccination:

Yeh tumhe HPV jaise STIs aur cervical cancer jaisi problems se safe rakhta hai. Apni lady doctor se discuss karne ke baad tum safety ke liye is option ko bhi choose kar sakti ho.

Conclusion:

Private parts mein itching hona kisi infection ya internal problem ka sign hai aur isse avoid karne ke liye apni personal hygiene maintain karna bahot zaroori hai. Private parts mein itching ya koi aur problem hone par ek online lady doctor se consult karna bahot zaroori hai. Tumhaari problem clinically diagnose karne ke baad hi tumhaari lady doctor tumhein usse related treatment dengi jisse ki tumhaari problem jald hi aur safely treat ho jaayegi.

Lastly humein sab girl se yahi kehna hai ki koi bhi problem ke liye online lady doctor se consult karne mein koi bhi embarrassment ya jhijhak mehsoos karne ki zaroorat nahi hai. Yaad rakhna ki koi bhi problem ya sawaal ke jawab ke liye hum tumhaare saath hain par haan, ek lady doctor woh trained professionals hai jo tumhein tumhaari body ko healthy rakhne mein sabse zyaada help kar sakengi.

Chhaa Jaa ke saath bane rehne ke liye humain follow karein:

Instagram - https://www.instagram.com/chhaajaa/

Facebook - https://www.facebook.com/chhaajaa

Youtube - https://www.youtube.com/results?search_query=chhaa+jaa

Aur humara girls only facebook group join karna matt bhoolna, jahan full on friends ke saath har time bakbak chalti rehti hai - https://www.facebook.com/groups/667075420473392

Resources:

Vaginal Itching, Burning, and Irritation

Why Is My Vagina Itchy? 14 Causes Of Vaginal Itching

What Is Vaginal Itching? Symptoms, Causes, Diagnosis, Treatment, and Prevention

Itchy Genitals: Causes, Types & Treatment

Vaginal Itching: Causes, Treatments, and Diagnosis

Your Vagina Health: 8 Tips to Stay in Tip-Top Shape

Vagina: What's normal, what's not

9 Tips to Keep Your Vagina Happy + Healthy