Periods Mein Meetha Ya Teekha Khaane Ka Mann Kyon Karta Hai?

Self care

“Mujhe periods mein kabhi kabhi teekha aur kabhi kabhi meetha khaane ka bahot mann karta hai. Aisa kyun hota hai? Aur kya yeh normal hai?”

  • 16 years old, Jaipur

Hi,

Apna itna zaroori sawaal humse poochne ke liye bahot bada thank you! Iss sawaal ke jawaab se sirf tumhari nahi aur bhi bahot saari ladkiyon ki madad hogi. Toh chalo ab hum mil kar tumhare sawaalon ka jawab dete hain.

Jaise ki tumne apne sawaal mein poocha, periods ke samay aksar humein alag alag cheezein khaane ka mann ho sakta hai. Kai baar humein meetha toh kai baar kuch teekha khaane ka mann karta hai. Aisa hum sabke hi saath hota hai aur yeh blooding ke saath aane wale kai doosre changes mein se hi ek hai. Humein apne body mein kya changes ho rahe hain yeh pata hona chahiye taaki hum apna khayaal rakh sakein. Tum chaaho toh ek lady doctor se bhi iske baare mein baat kar sakti ho.

Aao ab tumhare sawaalon ka jawaab dete hain!

Periods ke pehle sweets ya teekhe ki craving ka reason

PMS craving

Periods ke samay humaari body mein kai changes hote hain. Iska kaaran hai humare body mein banne wale do hormones - oestrogen aur progesterone. Yeh do hormones, humaare uterus ke development aur uske theek se kaam karne ke liye bahot hi zaroori hote hain. Blooding ke samay inn do hormones ke balance mein badlaav aata hain, jiski wajah se humein alag alag cheezein khaane ka mann hota hai, isse period cravings kehte hain. Khaane ki alag alag cravings humein periods se pehle aur periods ke dauraan, dono hi time ho sakti hai. Periods ke pehle yeh cravings PMS ya premenstrual syndrome ka part hoti hain.

Period mein aise toh humein kai food cravings hoti hain par kai ladkiyon ko sabse zyaada meetha khaane ka mann ho sakta hai. Periods mein progesterone ka level kam aur oestrogen ka level badhta hai, jiski wajah se blood sugar kamm ho jaati hai aur humein meetha khaane ka mann karta hai. Iske alava meetha crave karne ka ek kaaran aur hai; serotonin naam ke hormone ka level kam hona jo humaare mood pe kaafi assar daal sakta hai.

Period Craving Aur Pregnancy Cravings Mein Kya Difference Hain?

Food cravings humein sirf periods mein hi nahi hoti, balki pregnancy mein bhi ho sakti hai. Lekin ghabrao mat, period cravings aur pregnancy cravings mein farak hota hai aur inke baare mein jaanane se tum dono mein difference pata laga sakti ho. Period mein tumhe aksar meetha, chocolates, carbohydrates aur namkeen khaane ka mann kar sakta hai. Lekin pregnancy mein sirf kuch hi cheezein khaane ka mann karta hai, cravings specific hoti hai. Kuch khaane ki cheezon se ya unki smell se takleef bhi ho sakti hai. Food cravings ke saath, periods naa aana, ulti jaisa feel hona, nipples ka size badhna, shape change hona ya unka rang zyada dark hona, yeh saare symptoms pregnancy indicate kar sakte hain. Aise mein pregnancy test karna chahiye aur ek lady doctor se baat karni chahiye.

periods mein kya karna chahiye

Periods Mein Kya Khana Chahiye?

Agar tumhein cravings ho rahi hai, toh tum bejhijhak apni pasand ki cheezein khaa sakti ho lekin sahi maatra yaani portion mein. Koi bhi khaane ki cheez agar zaroorat se zyaada khaayi jaaye toh iska humari health par ulta asar ho sakta hain. Isiliye tum jo bhi khaao right amount mein khaao. Jaise ki agar tumhara teekha khaane ka mann kare toh khaao lekin itna bhi nahi ki pet mein jalan ya dard mehsoos ho. Koshish karo ki tum healthy khaana khaao aur dher saara paani peeyo, isse cravings control mein bhi rahengi aur tumhe aaram bhi mehsoos hoga.

Cravings Avoid Kaise Kar Sakte Hain?

Haalanki cravings periods ki process ka hi ek hissa hai, inhe kuch lifestyle changes se control bhi kiya jaa sakta hai. Jaise ki dher saara paani peekar khud ko hydrated rakho aur achhe se so kar apni neend poori karo, isse tumhein achha aur fresh mehsoos hoga. Zyaada namkeen cheezon ko avoid karne ki koshish karo, isse bloating bhi kamm hogi. Iske alava blooding mein tum healthy khaana khaao aur aaram karo.


private doctor


Zaroori nahi hai ki sabhi ladkiyon ko same cravings ho. Hum sabki bodies alag hoti hai aur lifestyle mein bhi farak hota hai. Isiliye humari cravings bhi alag ho sakti hai. Kisi ko zyaada meetha toh kisi ko zyaada teekha khaane ka mann kar sakta hai. Aur yeh sabhi humare blooding ke process ka hissa hain. Agar tumhein kisi khaane ke item se koi takleef ho rahi hai toh tumhein jald hi apne lady doctor se salah leni chahiye jo tumhari problem theek se solve bhi kar paayegi aur lifestyle aur dietery changes se period cravings ko control aur manage karne ke tareeke bhi tumhein bata paayegi.

Humein tum par poora bharosa hai ki tum apni health ka achhe se dhyaan rakh sakti ho! Baaki hum humesha tumhare saath hain. Koi bhi pareshaani ho humse bejhijhak poocho. Kyonki Chhaa Jaa ke saath no sharmana, no ghabrana!

Chhaa Jaa ke saath bane rehne ke liye humein follow karein:

Instagram - https://www.instagram.com/chhaajaa/

Facebook - https://www.facebook.com/chhaajaa

Youtube - https://www.youtube.com/results?search_query=chhaa+jaa

Aur humara girls only facebook group join karna matt bhoolna, jahan full on friends ke saath har time bakbak chalti rehti hai - https://www.facebook.com/groups/667075420473392

Sources:

Period Cravings: Explanation and How to Deal

Is PMS Sabotaging Your Diet?

Sugar and the Menstrual Cycle

Serotonin
How to tell the difference between PMS and pregnancy symptoms