Periods Mein Ulti Kyu Hoti Hai?

Hello, main 18 saal ki hu aur mujhe pichle 7 mahino se blooding ke pehle din mein ulti sa lagta hai. Kai baar maine ulti kar bhi di thi. Maine apne doston se poocha toh unhone bola ki aisa unke saath kabhi nahi hua. Mujhe bahot darr lag raha hai aur pata bhi nahi ki poochu bhi toh kisse poochu. Kahi yeh koi serious problem toh nahi hai?

• 18 year old girl from Varanasi

Hello!

Sabse pehle toh hum par itna trust karke apna itna personal sawaal humse puchne ke liye bahot bada thank you! Humein ye dekh ke khushi hui ki tum apni health ka itna khayaal rakhti ho, usse importance deti ho aur apne doubts ko khul kar poochti ho. Ye achhi aadat hamesha aise hi rakhna.

Ab baat karte hain tumhare sawaal ke baare mein, period mein ulti kyon aati hai? Ye janne ke liye aage iss blog ko padhti raho!

Bleeding Ke Time Ulti Hona Normal Hai?

Humaari body har ek change ke saath alag tareeke se deal karti hai. Theek usi tarah, periods ke dauraan aur beech mein hone waale hormonal changes se deal karne ke liye humari body premenstrual syndrome (PMS) se guzarti hai. Aur ulti aana yahi PMS ka ek lakshan hai. Blooding ke samay humari body kai hormonal aur chemical changes hoti hai jiske kaaran ulti jaisa mehsoos hota hai. Yeh bilkul normal hai.

Lekin, kai baar ulti ek serious condition ki bhi nishaani ho sakti hai. Aise mein tumhein ulti ke saath doosre lakshan jaise bukhaar aur bahot zyaada pain bhi ho sakta hai. Agar aisa hai toh tumhein jald se jald ek lady doctor se jaake milna chahiye. woh tumhari sahi tarah se help karengi.

Aao jaante hain ki periods mein ulti ke kya kya kaaran ho sakte hain aur kab yeh problem seriously leke humein ek lady doctor se bhi baat kar leni chaahiye.

Periods Ke Time Ulti Hone Ka Reason?

Ulti aane ke pehle aksar hame pet mein bechaini ya discomfort mehsoos hota hai, ise nausea kehte hain. Agar tumhein blooding ke dauraan nausea feel hota hai, toh uske peeche kai kaaran ho sakte hain. Yeh kabhi zyaada toh kabhi kam maatra mein mehsoos hota hai. Aur iski maatra mein farak karne se tum iska khayaal rakhna seekh jaaogi. Lekin ye zaroor yaad rakhna ki ulti ke saath jo lakshan tum experience karogi, use tum gaur se notice karo taki tum sahi waqt par sahi kadam utha sako.

Dysmenorrhea

Dysmenorrhea yani bahot painful period cramps nausea ka sabse common kaaran hote hain. Dysmenorrhea tumhare uterus mein contractions ke wajah se hota hai jo uterus ke lining mein prostaglandins zyaada matra mein hone par hota hai.

Dysmenorrhea mein pain aksar abdomen ke nichle hisse mein, ya phir hips mein, thighs mein, aur peeth mein hota hai. Yeh dard agar bahot zyaada badh jaata hai toh woh bhi ek reason ho sakta hai tumhare period ke waqt wale nausea ka. Zyaada matra mein prostaglandins humare khoon mein agar mil jaaye, toh bhi ulti jaisa feel ho sakta hai.

Dysmenorrhea ke baaki lakshanon mein hain chakkar aana, diarrhoea, adhik thakaan, sar dard, aur ulti.

Ek aur prakaar ka dysmenorrhea hai secondary dysmenorrhea, jisme period ke waqt ka dard kissi aur condition ke wajah se hota hai jaise endometriosis, jiske bare hum aage baat karenge.

Premenstrual syndrome (PMS)

Premenstrual syndrome (PMS) mein ek ladki physical aur emotional changes mehsoos karti hain. Yeh symptoms blooding shuru hone ke ek se do hafte pehle shuru hote hain, aur blooding shuru hone ke kuch din tak barkarar rehtein hai. PMS humaare body mein ho rahe hormonal changes ke wajah se hota hai. PMS jab dysmenorrhea ka roop le leta hai, tab humein dard aur badh jaata hai aur prostaglandins naamak ek hormone ke kaaran nausea mehsoos hota hai.

PMS mein hame yeh kuch lakshan mehsoos ho sakte hain :

• Constipation yaani kabz ya fir Diarrhoea
• Bloating yaani pet ka foolna
• Sar dard hona
• Peeth aur pair mein dard hona
• Breast mein dard hona
• Mood Swings
• Anxiety
• Irritate hona
• Sone mein takleef hona
  

Premenstrual Dysphoric Disorder (PMDD)

Premenstrual dysphoric disorder, ya PMDD, PMS ka severe form hota hai jiske lakshan PMS jaise hi hote hain par zyaada hote hain aur inke saath aksar nausea aur cramps bhi hone ke chances hote hain.

PMDD bhi PMS jaise hormonal changes ke wajah se hi hota hai, lekin PMDD mein hormonal changes ke wajah se humari body mein serotonin levels kam ho jaate hain. Serotonin ek aisa brain chemical hai jo hamare mood ko stabilise karta hai aur sleep, digestion, nausea aur sexual desire jaise body functions ko regulate karta hai. PMDD mein emotionally ek ladki irritated feel kar sakti hai aur saath hi mein ghabraahat bhi mehsoos ho sakti hai. Period ke dauraan focus karna bhi mushkil ho jaata hai aur bahot zyaada thakaan mehsoos hoti hai.

Pelvic Inflammatory disease (PID)

Pelvic Inflammatory Disease ya PID ek prakaar ka infection hai jo upper reproductive tract mein hota hai. Ye Sexually Transmitted Infection ke wajah se hota hai. Jab STI vagina se uterus, ovaries, aur fallopian tubes tak phail jaata hai, tab woh PID kehlata hai.

PID hone ke karanon mein se chlamydia aur gonorrhoea sabse common karan hain. Chlamydia aur gonorrhoea dono hi sexually transmitted infections (STI) hain jo bacteria ki vajah se hote hain. Yeh infections unprotected sex se transfer ho sakte hain. PID ke lakshanon ke taur par tumhe lower abdomen yaani pet ke nichle hisse aur pelvic area yaani private parts ke aas paas dard, sex ke waqt dard, vagina se abnormal discharge aur urine karte waqt dard mehsoos ho sakta hai.

Severe cases mein nausea, ulti, aur bukhaar bhi experience kiya ja sakta hai aur halaanki PID mein nausea feel hona normal hai, yeh nausea period na hone par bhi mehsoos ho sakta hai.

Endometriosis

Humare uterus ke lining mein jo tissue hai usko medical terms mein endometrium kaha jaata hain jo fool ke ek waqt ke baad toot jaata hai aur tab humein periods aate hain. Lekin yahi tissue agar humare uterus ke bahar badhne lage toh usko endometriosis kehte hai jo aksar humare ovaries, fallopian tubes, uterus ko nuksaan pahucha sakta hai.

Yeh tissue humaare uterus ke andar waale tissue jaise hi badh ke phat jaata hai, lekin kyonki iss khoon ke bahaar nikalne ka koi rasta nahi hai, yeh tissue humaare body ke andar hi expand hoke humein dard pahuchata hai. Issi dard ke wajah se humein ulti jaisa mehsoos ho sakta hai.

Endometriosis ke lakshanon mein hai adhik thakaan, diarrhea, kabz, pet ka foolna, sex ke dauraan ya baad mein dard hona, urination mein pareshaani hona, painful bowel movements hona, heavy bleeding hona, aur infertility.

Kya Iske Liye Lady Doctor Se Consult Karna Zaroori Hai?

Periods ke dauraan kuch lakshan experience karna tab tak normal hota hai jab tak yeh humare lifestyle mein koi dakhal na de. Ab shayad tum puchogi ki ek lady doctor ke paas kab jaana chahiye? Agar tum period ke waqt neeche diye gaye lakshan notice karti ho, toh tumhe jald se jald ek acchi lady doctor se consult kar lena chahiye.

• Adhik thakaan
• Cramps jo 3 din mein theek na ho
• Pelvic ya phir pet ke nichle hisse mein pain
• Continuous nausea, bukhaar, aur ulti
• Abnormal vaginal discharge.

Period se jude koi bhi lakshan agar period ke ek-do din ke baad chale jaaye, toh tumhein darne ki koi zaroorat nahi hai. Lekin agar yeh lakshan period ke 3 din baad bhi tumhe takleef de, toh tumhe ek lady doctor se consult kar lena chahiye jo tumhari condition ko achhe se samajhke tumhare har sawaal ka sahi jawaab deke madad kar sakti hain.

Chhaa Jaa ke saath bane rehne ke liye humein follow karein:

Instagram - https://www.instagram.com/chhaajaa/

Facebook - https://www.facebook.com/chhaajaa

Youtube - https://www.youtube.com/results?search_query=chhaa+jaa

Aur humara girls only facebook group join karna matt bhoolna, jahan full on friends ke saath har time bakbak chalti rehti hai - https://www.facebook.com/groups/667075420473392

Sources:

Nausea During Period: What Causes It and What Can You Do?

Nausea during period: Is it normal and remedies