Relationship Kya Hota Hai?
Apne doston ko kai baar unke relationship ke baare mein bolte hue toh hum sabne hi suna hai. Lekin ye relationship ka matlab kya hota hai? Ab dekho, ho sakta hai tumne haal filhaal kisi se baat karni shuru ki ho, ya kaafi samay se kisi ko jaante ho - jo friend se kahin badhkar hai, ya ho sakta hai tum kisi ke saath committed ho, ya bas relationships ka meaning achhe se jaanana ho, ye blog tumhare liye bilkul sahi destination hai.
Relationship Ka Matlab Kya Hota Hai?
Simple language mein relationship kya hai? Relationship ek tag hai jo tab lagta hai jab do log aapas mein ya toh birth se connected hote hain yaa connected feel karte hain. Ab ye maa baap, bhai behen se khoon ka rishta ho, ya dosti-yaari ka relation, ya phir ye boyfriend-girlfriend/couple waala relationship bhi ho sakta hai.
Ab tum shayad ye soch rahe hoge ki couple kya hota hai. Couple = Do Logon Ka Joda. Aam taur pe aise logon ko couple bolte hain jo ek romantic relationship mein hote hain.
Lekin ab sawal ye hai ki relationships shuru kaise hota hai?
Ab kyonki relationship kai tareeke ke hote hain, relationships ki shuruaat bhi alag alag hoti hai. Jaise socho tumhara koi dost hai - ho sakta hai jab tum dono mile, tabhi tumhari khoob jamne lagi aur bass, friendship ki shuruaat ho gayi. Issi tarah Mummy Papa ya family waale ya Bhai-Behen ke saath rishta birth se yaani janam se hi rehta hai. Ab last mein aaye boyfriend/girlfriend (ya shaadi) ka rishta. Ab aise relationships ki shuruaat aksar apne mann ki baat karne se hoti hai. Kyonki baat karne se hi baat banti hai.
Relationship Ke Types:
Relationship kaii tareeke ke hote hain. Lekin kya boyfriend-girlfriend waale romantic relationships mein bhi types hote hain?
Bilkul. Do logon ki choice, pasand, naapasand aur marzi ke hisaab se unka rishta alag alag tarah ka ho sakta hai. Samay ke saath bhi rishte badalte rehte hain.
Boyfriend-girlfriend waali relationship ke types mein live-in, ya casual, open, long distance jaise bahot tareeke ke relationships ho sakte hain. Toh ab physical relationship ka matlab? Living relationship kya hota hai? Chalo pata karte hain.
Romantic Relationships:
Sabse pehle samajhte hain romantic relationships ko. Ye woh rishte hain jin mein do log ek dusre ke liye strong pyar, attraction, aur intimacy feel karte hain.
Live-In Relationships:
Ye word shayad tumne kabhi naa kabhi suna hoga. Lekin ye live-in kya hai? Live-in relationships bhi ek tarah ka romantic relationship hota hai jisme ek couple ek doosre ke saath bina shaadi kiye ek hi ghar mein rehte hain. Shuddh Desi Romance shayad dekhi ho, bass waise hi situation ko live-in relationship kehte hain.
Open Relationships:
Open relationships bhi romantic relationships hote hain lekin aise relationships mein couples aapas mein baat karke, ek doosre ki marzi se se apne relationship ke bahar kisi aur ke saath bhi physical ho sakte hain.
Casual Relationships:
Ab tum shayad ye bhi soch rahi hogi ki casual ya physical relationship kya hota hai? Casual relationships us rishte ko kahte hain jis mein do log pehle se discuss karke, bina kisi commitment ke physical relationship rakhte hain.
Platonic Relationships:
Ek platonic relationship uss relationship ko kaha jaata hai jisme do log ek dusre se bahot deeply connect karte hain ya pyar karte hain lekin physically ya sexually attracted nahi hote hain.
Ek Healthy Relationship Kaise Maintain Karna Chahiye?
Relationships maintain karne mein kabhi kabhar kaafi stress ho jaata hai. Iske kaaran kaii baar relationships toxic ya kharab bhi ho jaate hain. Toh ek healthy relationship kaise rakhe? Aao batate hain.
Communication:
Ek relationship mein, romantic ho ya na ho, communication bahot important hota hai. Clear communication relationship mein understanding aur trust badhata hai aur saath mein emotional connection bhi strong karta hai.
Kyonki khul ke baat-cheet karke tum apne partner, dost ya parents ko acche se samajh sakte ho, open communication relationships ke har conflicts ya problems ka solution hota hai.
Respect:
Ek healthy relationship ka dusra sabse important factor hai respect ya samman. Relationship mein dono logon ka ek doosre ko respect karna zaroori hai. Ye respect tab hota hai jab tum apne partner ke mann ki baatein acche se sunke samajhne ki koshish karte ho, ya unki boundaries ko zabaradasti todne ki koshish nahi karte ho.
Trust:
Trust kisi bhi successful relationship ka foundation hota hai. Jab ek relationship mein trust rehta hai, tab uss relationship mein communication acche se hota hai aur ultimately relationship strong banta hai.
Honesty:
Honesty ek relationship strong karne ke liye bahot important hota hai. Honesty se aap clear and open communication kar paate ho jisse koi bhi misunderstanding ko suljhaaya jaa sakta hai. Bina honesty ka, ek relationship negative bann sakta hai.
Forgiveness:
Forgiveness ya maafi personal growth aur ek healthy relationship maintain rakhne ke liye bahot important hai. Iske alawa, forgiveness humare khud ki mental peace ke liye bhi zaroori hai.
Support:
Support ek relationship mein encouragement aur motivation badhata hai. Jab poori duniya hume nahi samajh sakti, tab jab humaare close log hume samajh ke humaara saath dete hain, tab unn logon ke saath relationship bahot strong banta hai.
Supportive relationships ek insaan ka mental health aur overall well-being ko bhi improve kar sakta hai.
Lekin ye yaad rakhna ki ek relationship 50-50 hota hai. Yaani tum ye saari baatein kyon na follow kar lo, agar tumhara partner tumhe same treat nahi karta hai, toh relationship negative, stressful hone ke chances bahot hote hain.
Date kya hoti hai?
Relationship ke baare mein toh tumhe almost pata chal hi gaya hai. Lekin kyonki har relationship dates se shuru hota hai, chalo ab ye janate hai ki date pe jana kya hota hai.
Jab do log saath mein ek dusre ko closely janne ke liye time spend karte hain, usko date kaha jata hai. Dates mein dinner ke liye bhi jaa sakte hain, ya saath mein film dekh sakte hain, kabhi kabhaar walk pe saath mein chale jaana, ya coffee peena, ya even momo khaane chale jaana - ye sab dates pe karne waale kaam hain.
Conclusion
Relationship do logon ke beech ke rishte ko kaha jaata hai. Relationship kaii tareeke ke hote hain. Couples, parents, friends, bhai behen, vagairah.
Couple waali relationship mein partner best friend jaisa hona chahiye aksar bola toh jaata hai, lekin ye phir bhi thoda alag hota hai. Ye romantic relationships bhi kaii tareeke ke ho sakte hain.
