First Time Physical Hone Ke Liye Khud Ko Kaise Ready Karein?
Main aur mere partner ko saath rehte hue 6 mahine ho gaye hain aur hum physical hone ke baare mein soch rahe hain. Main apne partner se bahot pyaar karti hupar thoda darr bhi lag raha hai. I don’t know ki apne aap ko prepare kaise karu?
- 19 y/o from Bihar
Hello! Sabse pehle hum kehna chahenge ki thank you hum se apna itna personal sawaal poochne ke liye aur hum par itna bharosa karne ke liye. Hum samajh sakte hain ki tum kaisa mehsoos kar rahi hogi aur yahi kehna chahenge ki kisi bhi cheez ko first time experience karna thoda scary aur ajeeb saa lag sakta hai, aur aisa feel karna natural hai. Aaj hum isi baare mein detail mein baat karenge ki pehli baar physical hone ke liye apne aap ko mentally, physically aur emotionally kaise ready karein.
Sab se pehle….
Khud se poocho “kya main tayyar hoon?”
Ab online kahin bhi, kabhi bhi apne marzi ke Doctor se karo baat. Medibuddy ke saath. Humaara Medibuddy coupon code ka use karo aur easily Doctor se connect karo.
Sabse pehle yeh samajh na bahot zaroori hai ki sex sirf ek physical yaani sharirik act nahi hai. Is mein tumhare emotions aur mental presence ka rehna bhi zaroori hai taaki yeh ek accha aur happy anubhav ho. Toh tum khud se pucho ki kya main iske liye taiyaar hoon? Agar tumhara jawaab yeh hai ki tum physically, emotionally aur mentally prepared ho, toh apne partner ke saath baat karo aur haan, ek baat yaad rakhna, hamesha condom ke saath safe sex hi practice karo.
In teeno sides se tayyar hona bahot zaroori hai taaki tumhein apne first time ke baad koi guilt ya regret mehsoos na ho. In teeno factors ko milake tum ek safe, healthy aur ek enjoyable experience le paaogi.
Sexual arousal sirf physical nahi balki mental aur emotional factors se bhi juda hota hai. Isiliye sex ke pehle humara har side se ready hona bahot zaroori hai.
First time sex ka decision kabhi bhi jald baazi mein nahi lena chahiye. Har kisi ka alag comfort level hota hai jab baat sex ki hoti hai, toh tum ye step bina kisi pressure ya guilt ke apne dil aur dimag ki sun kar lena.
Apne partner se khul ke baat karo
Sex ko ek loving aur enjoyable experience banane ke liye bahot zaroori hai ki tum apne partner se khul ke baat karo, sex se pehle, sex ke time aur uske baad bhi. Tumhara apne partner se baat karne ka sabse bada fayeda yeh hai ki tum dono ko pata rahega ki ek dusre ko kya accha lagg raha hai aur kya nahi, aur tum kya expect kar sakte ho.
Tumhein kya pasand hai aur kya nahi ya tumhare partner ko kya pasand hai, kya nahi yeh pata rehne se first time ka stress ya nervousness thodi kamm ho jaati hai.
Condoms se dosti
Jab baat sex ki aati hai, condoms tumhare best friends hai. Condoms sirf tumhein unchahi pregnancy se hi nahi balki sexually transmitted diseases aur infections (STD/STDIs) se bhi protect karte hai. Apne aap aur apne partner ki safety aur health ke liye humesha condom ka use karna chahiye.
Aur haan, penetrative sex yaani jab male private parts female private parts ke andar jaata hai, us time flavou red condoms ka istemaal matt karna. Yeh kai baar reactions create kar sakti hai jaise ki private parts mein infections ya itching.
First time sex: embarrassment aur pain
Aksar kai ladkiyan first time sex karne pe dard mehsoos karti hai but yeh har kisi ko nahi hota hai. Jaha tak baat hai ki kitna pain feel hota hai, woh har kisi ke liye alag hota hai. Is dard ke kai kaaran ho sakte hai jaise ki, lubrication (private parts mein geelapan) kamm hona jiski wajah se friction zyaada hoti hai aur usse dard bhi zyaada hota hai, tumhari apni anxiety ki wajah se bhi pain ho sakta hai- anxiety ya ghabrane se muscles tense ho jaati hai.
Dard ko avoid karne ka best tareeka hai ki foreplay (yaani sex se pehle wali cheezein jo tumhein aur tumhare partner ko excite karte hai) ka time badha do aur water based lube ka use karo. Sabse important yeh bhi hai ki tum aur tumhara partner khul ke baat karo. Agar tumhein sex ke beech mein lage ki tum ready nahi ho toh bina kisi jhijhak ke apne partner ko boldo.
Sex ke waqt embarrassed ya shy feel karna bilkul normal hai. Is embarassment ki wajahaein bhi kai hai lekin ek yeh yaad rakhna zaroori hai ki sex koi galat cheez nahi hai. Agar tum ready ho, tumhra partner ready hain toh bejhijhak sex ke baare mein baat karo aur humse apne saare sawaal poocho.
Sex ke baad - Aftercare
Humesha, sex ke baad pee yaani urinate karna yaad rakhna. Ise koi bhi antibodies jo sex ke time transfer hue ho body se nikal jaate hai. Apne private parts ko saadhe paani se halke haath se saaf karna zaroori hai, aur agar koi bleeding notice ho toh uska flow dekhna ki kamm hai ya bahot zyaada. Agar zyaada bleeding, pain ya burning wali feeling mehsoos ho toh ek online lady doctor se consult karna zaroori hai, woh bhi jald se jald.
Jaha tak baat rahi relationship ki, sex ke baad relationship changed feel ho sakti hai isliye zaroori hai ki tum sex ke baad bhi apne partner se khul ke baat karo, apni feelings share karo, aur bahot saari cuddling bhi karo.
HPV ki Importance
HPV yaani Human Papillomavirus ,ek virus hai jo ki bahot se infections cause karta hai aur kuch cases mein cancer bhi. HPV se bachne ke liye vaccine lena bahot zaroori hai. Yeh sirf tumhari sex life ko safe nahi rakhta but overall tumhari health bhi sahi sahi hai. Apni lady doctor se HPV vaccine ke baare mein aaj hi discuss karo aur jald se jald apne aap ko vaccinate karwa lo.
Lastly, hum yahi kehna chahenge ki koi bhi problem ke liye online lady doctor se consult karne mein koi bhi sharam ya jhijhak mehsoos karne ki zaroorat nahi hai. Tumhare kisi bhi sex-related sawaal ya apni private parts ki health se jude sawaalon ke jawaab tumhein ek acchi lady doctor hi de payengi aur sahi slaha bh de payengi.
Aur yaad rakhna ki Chhaa Jaa ke saath no sharmana, no ghabrana.
Chhaa Jaa ke saath bane rehne ke liye humein follow karein:
Instagram - https://www.instagram.com/chhaajaa/
Facebook - https://www.facebook.com/chhaajaa
Youtube - https://www.youtube.com/results?search_query=chhaa+jaa
Aur humara girls only facebook group join karna matt bhoolna, jahan full on friends ke saath har time bakbak chalti rehti hai - https://www.facebook.com/groups/667075420473392
References:
How to Lose Your Virginity Without Pain: 26 Tips, Techniques, and More
Tips to prepare for your first time having sex | Durex – Durex UK
