Periods Ke Time Kitna Blood Flow Hota Hai?

Periods


“Mujhe kuch dino pehle pata chala ki mere doston ko periods ke waqt mujhse kam blooding hoti hai jabki mujhe itni blooding hoti hai ki kabhi kabhi pad overflow hoke leak bhi karne lagta hai. Maine internet pe bahot dhoondhne ki koshish ki par unn sab sites pe bahot hi complicated tareeke se samjhaaya gaya hai. Mujhe bahot tension ho rahi hai ki kahi yeh koi problem ki baat toh nahi hai?

20 year old girl from Agra

Hello! Sabse pehle toh thank you ki tumne hum pe itna trust karke apni problem share ki hai. Usse bhi badi baat toh yeh hai ki tum apne health ko leke itni curious ho. Health ka khyaal rakhne mein yahi curiosity sabse important cheez hoti hai. Tumne bahot hi sahi sawaal puchha hai aur hum tumhe tumhaare sawaal ka jawaab dene ki koshish karenge.

Toh chalo pata karte hain ki periods ke time kitna blood flow hota hai.

Periods Mein Kitni Bleeding Hoti Hai?

On an average, har ladki 30 se 40 ml, yani kareeban 2 se 3 tablespoon har mahine bleed karti hai. Kuch studies ke according yeh number 60 ml yani 4 tablespoon bhi ho sakta hai. Lekin hum periods ke dauraan exactly kitna bleed karte hain, yeh pata lagana mushkil hai. Tum hi socho, humaara uterus soch samajh ke ek hi amount mein bleed thodi hi karega. Kuch ladkiyon ko heavy bleeding ho sakti hai aur kuch ladkiyan light bleeding experience kar sakti hain.

Chinta ki baat tab hogi agar extremely kam ya zyaada flow ke saath tum doosre symptoms experience karo jaise ki, pet mein bahot zyaada dard, ya periods ke dauraan ulti sa lagna. Aise mein tum ek gynaecologist se consult kar sakti ho. Voh behetar tareeke se tumhe irregular flow ka kaaran bata paayengi.

Chalo ab yeh pata karte hain ki bleeding kaise measure karein, kya normal hai, aur kya hone par humein ek lady doctor se baat kar leni chahiye.

Sanitary pad


Bleeding Zyaada Hai Ya Kam Kaise Pata Kar Sakte Hain?

Periods mein sirf blood hi nahi balki uske saath mucus aur uterus ka tissue bhi nikalte hain jiske kaaran blood loss ka sahi anumaan lagana thoda sa mushkil ho sakta hai. Blooding mein sirf 36% khoon hota hai aur baaki 64% khoon ke clots (yani jama hua khoon), uterus ki lining, mucus (yani balgam), aur tissue hote hain. Par sanitary product jaise pads ya tampons ke usage se hum anumaan laga sakte hain ki humaara kitna blood flow ho raha hai.

Pad

Regular pads 5 ml tak blood soak kar sakta hai jabki super-absorbent pads 10 ml, yani doguna zyaada soak karta hai. Iska matlab yeh bhi hai ki tum jitne pads use karti ho usi hisaab se apne bleeding ko measure kar sakti ho. Tum apne flow ke according, regular/ maxi/ ultra thin jaise types mein se choose kar sakti ho. Aur tumhe din mein kitne pads change karne pad rahe hain uspe se assume kar sakti ho ki flow zyaada hai ya kam.

Tampon

Ek regular size ka tampon usually 5 ml ke kareeb bleeding absorb kar sakta hai lekin agar tum extra-absorbent waale tampons use karti ho, toh phir yeh yaad rakhna ki yeh waale tampons doguna zyaada bleeding absorb kar sakte hain. Uss hisaab se dekha jaaye toh agar tum ek mahine mein 6 se 12 tampons use kar rahi ho, toh phir tumhe bleeding 60 ml ke aas paas hoti hogi. Agar tum tampon ka size, kitne tampons use kar rahi ho, aur tampons change karte waqt kitna full rehta hai, inn cheezon ko observe karogi, toh aaram se blood flow ka andaaza laga paaogi.

Menstrual Cup

Apna blood flow naapne ka sabse aasaan tareeka hai menstrual cups. Menstrual cups use karne par tumhe yeh tension nahi lena padega ki tumhaara sanitary product kitna blood soak kar raha hai. Size pe depend karte huye, ek menstrual cup mein 30 se 60 ml ke aas paas blood hold karne ka capacity hoti hai.

Apne menstrual cup ko khali karte samay, tum cup mein kitna blood hai yeh track kar sakti ho aur apne phone par ka ya phir kisi notebook mein note kar sakti ho. Isi tarah agle 3 ya 4 periods ka track rakh kar tum aaramse apne flow ke rate ka anumaan laga sakti ho.


Puberty Body Changes


Kya Period Flow Age Ke Wajah Se Badalta Hai?

Haan yeh possible hai ki age ke saath humaare flow mein changes aayein. Puberty se adulthood tak humaare hormones mein bhi kai changes aate hain jiske vajah se flow par asar padd sakta hai. Usually puberty mein blooding ka flow zyaada hota hai aur jaise hum bade hote jaate hain, flow kam hota jaata hai.

Tumne yeh zaroor notice kiya hoga ki tumhare first period ke flow mein aur abhi ke flow mein already kaafi badlaav aa chuka hai. Isi tarah jab tum 30 ya 40 ke aas paas pahonch jaogi, tab aur bhi badlaav notice karogi. Flow mein changes doosre factors ki vajah se bhi aa sakte hain jaise ki birth control use karna, stress ya lifestyle changes. Kai baar period flow hume humari health ke baare mein bhi kai cheezein bata sakta hai.

Heavy Bleeding

Heavy bleeding, jisko ‘Menorrhagia’ ke naam se bhi jaana jaata hai, ek aisa menstruation disorder hai jismein bahot heavy bleeding hoti hai aur bleeding 7 ya 8 dino se zyaada tak last karti hai. Menorrhagia aksar hormones mein asantulan ya kisi medication ke istamaal ke kaaran ho sakta hai.

Spotting

Spotting, jisko medically ‘Metrorrhagia’ kehte hain, ek aisi condition hai jismein period khatam hone ke baad ya shuru hone se pehle bleeding hone lagti hai. Spotting aksar kai karanon ki vajah se ho sakti hai jaise implantation bleeding, ovulation, uterine polyps, contraceptive (yani garbh nirodhak) medications etc.

Light Bleeding

Light flow ek aur prakaar ka bleeding hai jisme humaara flow ‘light’ ya phir normal se bahot kam ho jaata hai. Light flow bhi ovulation, PCOS, menopause, infection, jaise kai kaarakon ke vajah se ho sakta hai.

Lady doctor


Doctor Se Kab Milna Chahiye?

Periods har ladki ke liye ek personal experience hota hai aur sach kaha jaye toh tumhaare alaava tumhaare periods ko aur koi nahi jaan sakta hai. Isiliye agar tum periods ke dauraan koi symptoms dekh rahi ho jo tumhe naye lage, toh hum zaroor tumhe apne doctor se baat kar lene ki salah denge. Tumhaari doctor sab lakshanon ki jaanch karke, bina kisi judgement ke tumhaari madad karengi. Aur agar ​​​​tumhaari lady doctor tumko yeh bataaye ki tumhaara period normal hi hai aur tumko koi bhi problem nahi hai, toh chalo at least tumko yeh toh pata chal jayega ki tum healthy ho.

Chhaa Jaa ke saath bane rehne ke liye humein follow karein:

Instagram - https://www.instagram.com/chhaajaa/

Facebook - https://www.facebook.com/chhaajaa

Youtube - https://www.youtube.com/results?search_query=chhaa+jaa

Aur humara girls only facebook group join karna matt bhoolna, jahan full on friends ke saath har time bakbak chalti rehti hai - https://www.facebook.com/groups/667075420473392

Sources:

How Much Blood Do You Lose on Your Period? Cups, Tampons, More

What's “normal”?: period volume and heaviness

?How much blood do you lose during your period?