Garbh Nirodh Ke Kaun Kaun Se Tareeke Hain?
Garbh Nirodh. Ye shabd sunte hi zyaadatar log sochte hain goli yaani pills ke baare mein - yaa kuch log sochenge condoms ke baare mein!. Lekin kya tumhe pata hai ki inke alaava bhi pregnancy ko rokne ke kai saare tareeke hote hain? Kaunse tareeke? Chalo pata karte hain.
Garbh Nirodh Ke Types:
1: Permanent Garbh Nirodh
Permanent garbh nirodh mein vo saare contraception ke tareeke aate hain jinko use karke hum hamesha hamesha ke liye (permanently) pregnancy hone ki sambhavna ko khatam kar dete hain.
2: Reversible Garbh Nirodh
Adhiktar cases mein garbh nirodh aksar ek temporary decision hota hai, jiska matlab hai ki couples decide karte hain unko abhi pregnant nahi hona hai aur isiliye zyaadatar log reversible garbh nirodh ka hi use karte hain. Aise tareekon ka use bandd kar dene se unka asaar bhi khatam ho jaata hai aur fir aap normally pregnant ho sakte ho.
Permanent Aur Reversible Garbh Nirodh ke Tareeke Kaunse Hain?
Toh chalo, ab yeh dekhte hain ki permanent aur reversible garbh nirodh mein kaun kaun se contraceptive methods aatein hain.
Permanent Garbh Nirodh :-
1] Tubal Ligation:
Tubal ligation female sterilisation technique hai jisme fallopian tubes ko baandh diya jaata hai jiske kaaran sperm aur egg kabhi mil nahi paate hain.
2] Vasectomy:
Vasectomy ek male sterilisation process hota hai jisse sperm ko penis tak pahunchne se roka jaata hai.
Ab online kahin bhi, kabhi bhi apne marzi ke Doctor se karo baat. Medibuddy ke saath. Humaara Medibuddy coupon code ka use karo aur easily Doctor se connect karo.
Reversible Garbh Nirodh :-
A) Physical Garbh Nirodh -
1] Hormonal Vaginal Contraceptive Ring:
Vaginal ring ek chhota ring hota hai jo vagina ke andar pehna jaata hai. Yeh ring humaari body mein estrogen aur progestin release karta hai.
2] Male Condom:
Sabse commonly use hone wala contraception, male condoms ek barrier jaisa kaam karta hai. Condoms sperm ko female body mein jaane se rokta hai.
3] Female Condom:
Female condom bhi male condom jaisa ek barrier create karta hai jo vagina ke andar insert karne par sperm ko andar jaane se rokta hai.
4] Intrauterine Device (IUD):
Intrauterine device ya IUD ek T-shape ka device hota hai jo uterus ke andar pregnancy ko rokne ke liye daala jaata hai.
5] Implant:
Implant ek patla rod saa hota hai jisko female ke upper arm ke skin ke andar insert kiya jaata hai jo pregnancy rokne ke liye body mein progestin naam ka chemical release karta hai.
6] Patch:
Skin patches abdomen ke nichle hisse, buttocks, ya upper body (except breasts) mein pehne jaate hain jo progestin aur estrogen bloodstream mein release karke pregnancy ko rokte hain.
B) Chemical Garbh Nirodh -
1] Injection/Shots:
Kai saare log contraception ke taur par har 3 mahine progestin shots bhi lete hain.
2] Combined Oral Contraceptives:
Combined oral contraceptives, estrogen aur progestin hormones ke combination hote hain jinko har roz same time pe lena hota hai.
3] Progestin Only Pill:
Ye pill ka kaam exactly iske naam jaisa hai progestin only! Iss pill mein khali progestin hormone rehta hai.
4] Spermicides:
Spermicides bahot saare prakaar mein aate hain jaise gel, creams, tablets, etc. aur yeh products sperms ko maar ke pregnancy rokta hai.
5] Emergency Contraceptive Pills:
Emergency contraceptive pills, ya morning after pills, aise pills hote hain jinko sex ke 3 se 5 dino ke andar lene par pregnancy rok sakta hai.
Lady Doctor Se Consult Karna Zaroori Hai Kya?
Condoms ke istemaal ke alaava, kisi bhi contraception se jude consultation hamesha apne lady doctor se karna chahiye. Surgical contraception ho ya pregnancy rokne ki dawa ka naam, aisi steps hamesha apne lady doctors se consult karke hi uthani chahiye.
Contraception ya garbh nirodh kai prakaar ke hote hain. Agar tum garbh nirodh aur unke side effects ke baare mein aur janana chahati ho, toh zaroor apne lady doctor se consult karke unse apni saare sawaal bejhijhak puch lena. Ya fir tum paas hi kisi Parivar Seva Clinic ki sewaaon ka upyog kar sakti ho ya Bol Behen pe bata sakte ho!
