Periods Ke Kitne Din Baad Sambandh Banana Chahiye?

Sex aur periods ye do words, ek saath, ek sentence mein jaise hi aate hain, humaare dimaage mein questions ghoomne lagte hain. Agar pregnant ho gaye toh? Infections ho gaye toh? Good news toh nahi sunni padegi? Sach ye hai ki Pregnancy ki process ko acche se jaan kar, samajh kar hi iss confusion ko door kiya jaa sakta hai. Toh aao, samajhte hain ki periods ke baad sex karna safe hai ya nahi.

Pregnancy Kaise Hoti Hai?

Pregnancy tab hoti hai jab ek egg ek sperm se milkar fertilise hota hai aur fir uterus mein implant hota hai. Humaari ovaries har mahine ek egg release karti hain jisse ovulation kehte hain. Ye egg mature hone par ovaries se fallopian tube mein aa jaata hai. Agar iss dauraan fallopian tube mein sperms ho toh voh is egg ko fertilise kar sakte hain. Fertilised egg fir ek embryo yaani bhroon bann jaata hai aur uterus se jud jaata hai - is process ko implantation kehte hain.

Aur agar yeh egg fertilise naa ho toh voh dissolve ho jaata hai aur uterus lining ke saath hi do hafte baad blooding yaani periods ke form mein body se nikal jaata hai. Phir kya period ke baad sex karne par pregnancy ho sakti hai?

Period Ke Kitne Din Baad Sex Kare Toh Pregnancy Ho Sakti Hai?

Menstrual cycle ke kisi bhi phase mein agar unprotected sex yaani bina condom sex ho toh pregnancy ke chances ho sakte hain. Fark sirf ye hai ki kabhi chances high hote hain aur kabhi thode kamm. Ovulation aur uske aas paas ke 7 din ko ‘fertility window’ kehte hain. Inhi dino mein pregnancy ke chances sabse zyaada high hote hain. Ovulation phase ke khatam hone ke baad yaani periods ke kuch din pehle, periods ke dauraan aur periods ke kuch din baad tak fertility sabse kamm hoti hai. Isiliye iss time par pregnancy ke chances bahot kam hote hain lekin yaad rakhna, pregnant hone ka chance kabhi bhi bilkul zero nahi hota.

Toh chahe kuch bhi ho hamesha safe sex practise karo, bhale hi menstrual cycle ke kisi bhi phase mein ho.

Safe sex kaise karte hain?

Agar contraception ka koi bhi tareeka istemaal nahi kiya jaaye, toh aise mein pregnancy ke chances kaafi badh jaate hain. Contraception yaani garbhnirodhak mein kai saare options available hain, jaise ki:

• Condoms
• Birth Control Pills yaani garbh nirodhak goli
• Emergency Contraceptive Pills yaani 72 ghanto waali goli
• IUD yaani Copper T, etc.

Halaanki, contraception ka istemaal karke pregnancy ko roka jaa sakta hai, lekin agar fir bhi kisi kaaran se unwanted pregnancy ho jaaye, toh aise mein kya kar sakte hain?

Galti se Pregnant ho jaye toh kya kare?

Agar tum galti se pregnant ho gayi ho toh ghabrao mat, sabse pehle ek gynaecologist se jaake milo. Voh tumhari conditions ko analyse karke, acche samajh ke, pregnancy abort karne ke tareeke bataayegi aur tumhe achhe se guide karegi.

Unwanted pregnancy do tareeke se abort ki jaa sakti hai:

• Medical abortion, jo ki pregnancy ke shuruaati dino mein (9 hafte tak) use kiye jaa sakta hai.
• Surgical abortion.

Unwanted pregnancy se khud ko safe rakhne ke liye ye zaroori hai ki hum hamesha protected aur safe sex practise karein. Aur haan, apni period cycle ko bhi zaroor track karo.

Chhaa Jaa ke saath bane rehne ke liye humein follow karein:

Instagram - https://www.instagram.com/chhaajaa/

Facebook - https://www.facebook.com/chhaajaa

Youtube - https://www.youtube.com/results?search_query=chhaa+jaa

Aur humara girls only facebook group join karna matt bhoolna, jahan full on friends ke saath har time bakbak chalti rehti hai - https://www.facebook.com/groups/667075420473392

Sources

Safe days for not getting pregnant: Ovulation and more

I had unprotected sex right after my period ended. Could I be pregnant?

Also Read : Period Ke Time Pe Sex Karna Chahiye Ya Nahi?