Period Time Par Kyon Nahi Aata? Aur Late Aane Par Kya Karna Chahiye?
“Mujhe har mahine late periods hote hain. Iski wajah se main humesha tanaav mein rehti hoon. Maine suna hai ki periods late hone ka matlab pregnancy ho sakti hai. Kya yeh sach hai? Please meri help kijiye.”
- 17 years old, Dhanbad
Hi!
Yeh apna personal sawaal hum pe bharosa kar ke poochne ke liye thank you! Tum bahot brave ho jo tumne apni health ke baare mein itna socha. Ab tum chinta mat karo, hum tumhari ismein poori madad karenge!
Ek ladki ki life mein periods lag bhag 13 saal ki age se shuru ho jaate hai, par periods hone ka koi fixed age aur time nahi hai. Kai ladkiyon mein yeh 12 saal ki age se bhi shuru ho jate hai aur kai ladkiyon mein ye 14 saal ki age tak shuru hote hai.
Periods aksar 3 se 5 dino tak hote hain. Par kai ladkiyon ke liye yeh ek hafte tak bhi chal sakte hain. Haina ek dum surprising baat?
Ab tumhare sawaal par aate hain. Jis tarah periods shuru hone ki age aur periods hone ki date har ladki ke liye alag alag hoti hai, ussi tarah periods ke aane ki dates mein badlaav bhi hote rehte hain. Ek blooding ka cycle 28 se 35 din tak ka ho sakta hai iska matlab ki tumhare next period mein 4 se 7 din ka gap ho sakta hain aur ye ek dum normal hai. Par agar woh isse bhi late ho jaayein, to kya yeh chinta ki baat hai? Chalo jaante hai.
Period Late Aane Ka Matlab?
Late period har ladki ko tension mein daal dete hain. Agar tumhare periods time pe nahi aa rahe toh usse hum simple shabdo mein late periods kehte hain.
Zyaadatar ladkiyon ke blooding cycle ko regular hone mein kaafi time lag sakta hai. Teenage mein periods ka late hona ek bahot hi common baat hai kyonki tumhari body mein abhi bhi changes aa rahe hain. Inn changes ki wajah se periods ki date aur dino mein bhi changes aate hai. Toh agar tumhare sath aisa ho raha hai, toh tum chinta matt karo. Tum is mein akeli nahi ho!
Period Late Kyon Hota Hai?
Ab yeh jaan lete hai ki aakhir periods late kyon hote hain? Blooding late hone ke bahot se kaaran ho sakte hai jaise ki agar tum achanak se diet pe chali gayi jiski wajah se tumhara weight kamm ho gaya ya tumne bahot zyada exercise kar rahi ho toh tab bhi tumhare periods late ho sakte hain. Iske alawa in mein se kuch kaaran bhi periods late karwa sakte hain:
Stress
Rozana ke stress se tumhare periods pe bhi assar padta hai. Maan lo, tumhare exams aane waale hain aur tum bahot stress mein ho, tab bhi periods late ho sakte hain. Stress tumhare hormones par galat asaar daalta hai jiski wajah se tumhare period cycle mein gadbad ho jaati hai.
Emergency contraceptive pill ka use
Emergency contraceptive pills (ECP) pregnancy se bachne ke liye li jaati hai lekin yeh pills periods par bhi assar daal sakti hain. In pills mein hormones hote hain jinki wajah se humari body mein hormonal imbalance hojata hai aur isi ki wajah se humare periods late ya jaldi aajate hain.
PCOS/PCOD
Yeh ek aisi condition hai jis mein ovary time par egg nahi bana paati. Iske kaaran period cycle late ho jata hai. Agar tumhein PCOS ya PCOD hai toh ho sakta hai ki tumhein kai mahino tak periods na ho. Iske ilaaj ke liye tumhein ek achi lady doctor se consult karna chahiye.
Thyroid
Humara shareer bahot saare hormones se bana hua hai. Unhi mein se ek hai thyroid. Agar tumhara shareer zarurat se zyada ya zarurat se kamm hormone bana raha hai toh usse tumhare periods late ho sakte hain.
Yeh pareshaani kaafi common hai, par ghabrana nahi. Iska ilaaj possible hai!
Pregnancy
Agar tum physical hui ho aur tumhare periods late hain, toh ho sakta hai tum pregnant ho. Aisi situation mein yeh zaroori hai ki tum bina ghabraye ek lady doctor se consult karo.
Period Late Aaye Toh Kya Kare?
Agar tumhare periods ek ya do baar late hue hain, toh ghabraane ki baat nahi hai. Par agar yeh har mahine late hote hain aur tumhein fever, ulti, hairfall, acne jaisi takleef bhi hoti hai toh turant hi ek lady doctor se consult karo. Woh tumhari problem bhi samjhegi aur uska sahi solution bhi dengi.
Period Track Karne Ki Importance
Hum ladkiyon pe kai baar padhai ke saath saath ghar ki zimmedariyan bhi hoti hai. Aur hum har ek responsibility ko jitna ho sake nibhaate hain. Par kabhi kabhi is chakkar mein hum apni khud ki health ka khyaal rakhna bhool jaate hain. Apne periods ko track karna humari health ko accha rakhne ke liye bahot zaroori hain. Blooding cycle ko track karne se tum apne periods ke din aur next period kab hoga usse predict kar paaogi, aur agar tumhare periods irregular ho rahe hain toh tum unko track kar ke ek lady doctor ko sab details mein bata paogi taaki woh tumhein sahisalah de paayein.
Period tracker ek bahot hi accha tareeka hai apni blooding ki dates ko yaad rakhne ka. Yeh tumhare agle periods ki date bhi predict karke tumhein bata sakta hai, taaki tum apne next blooding cycle ke liye ready ho. Isse tum tension-free bhi rahogi aur prepared bhi.
Internet Pe Sahi Information Dhoondhe
Internet ek bahot hi amazing jagah hai. Par internet pe periods se related bahot saari information hai, kuch sahi aur kuch galat. Toh tum jo bhi padhti ho uspe kabhi bhi blindly trust matt karna. Humesha ek bharosemand site se hi apni information lena aur uspe trust karna.
Usse behtar yeh hai ki tum ek lady doctor se consult karo. Woh professionals hai jinhe pata hota hai ki tumhari problem kya hai aur uska sahi solution kya hai. Unse tum khul ke apni problems share kar sakti ho aur woh tumhein bina judge kiye sahi salah denge.
Tum apni health ka humesha dhyaan rakhna. Aur agar tumhare mann mein aur koi sawaal ho toh humse zaroor poochna! Kyonki Chhaa Jaa ke saath no sharmana, no ghabrana!
Chhaa Jaa ke saath bane rehne ke liye humein follow karein:
Instagram - https://www.instagram.com/chhaajaa/
Facebook - https://www.facebook.com/chhaajaa
Youtube - https://www.youtube.com/results?search_query=chhaa+jaa
Aur humara girls only facebook group join karna matt bhoolna, jahan full on friends ke saath har time bakbak chalti rehti hai - https://www.facebook.com/groups/667075420473392
Sources:
Why Is My Period Late?
How Late Can a Period Be? When to Be Concerned
10 Reasons for a Missed Period
Why Is My Period Late?
