Tampon Kya Hota Hai?

What is Tampon

Periods mein blooding ko collect karne ke liye aur kapdon mein dikhne se rokne ke liye tareeke toh bahot hai: pads, tampons, menstrual cups, period panties, etc.. Aur inhi mein se ek hai tampons. Toh ye tampons kya hain aur inhe use kaise kiya jaata hai? Chalo pata karte hain.

Tampons Kya Hain?

Simple shabdon mein, tampons aise sanitary products hain jinko menstrual flow yaani period ke blood ko absorb karne ke liye vagina ke andar insert karte hain.

Tampons bhi pads ke tarah different sizes mein aate hain jinko apni body ke menstrual flow ke hisaab se use kiya jaa sakta hai.

Tampons Kaise Use Kare?

Shuruaat mein tampons thode daraavne zaroor lag sakte hain. Lekin ek-do baar use karne ke baad tum inhe bina kisi pareshaani ke aaram se use kar paaogi, bass aadat banaane ki der hai! Toh aakhir inhe insert kaise kare?

Step 1:

Sabse pehle toh tumhein ek comfortable position dhundhni hai. Jaise ek leg ko chair par rakhke ya squat karke.

Step 2:

Phir, saaf haathon se tampon ko unwrap karke isse rassi wali hisse se pakad ke, vagina ke andar push karna hai. Insert karte waqt tampon ko apni backbone ke taraf push karna hai.

Step 3:

Ek baar tumhe lage ki tampon cervix tak pahonch chuka hai, bas, tumne successfully tampon pahan liya hai. Aur haan! Tampons ko har 4-8 ghanton ke andar change karna matt bhoolna.

Tampons Ke Pros Aur Cons:-

Duniya ki har cheez ki tarah, tampons ke bhi kuch faayde yaani pros aur kuch nuksaan yaani cons ho sakte hain:

PROS:

  • Kyonki ye size mein bahot hi chhote se hote hain, is vajah se tampons travel-friendly hote hain.
  • Saath hi, ye pool friendly bhi hote hain. Yani periods mein swimming bhi ab aaraam se kar sakti ho!
  • Tampons ko ek baar acche se insert karne ke baad inka presence feel nahi hota hai, yani full comfort.

CONS:

  • Bahot rare cases mein logon ko tampons use karne se toxic shock syndrome (TSS) ho sakta hai. Ye ek serious medical condition hota hai jis mein bacteria humaare khoon mein ghus kar toxins release karte hain. Isse bachne ke liye tampons ko har 4-8 ghante pe badalna bahut zaroori hai!
  • Dusra disadvantage ye hai ki pads ki hi tarah tampons bhi bilkul environment friendly nahi hain. Ek tampon decompose hone mein taqreeban 500-1000 saal tak lagg sakte hain.
  • Kabhi kabhi first-time users ke liye tampons uncomfortable ho sakte hain.

Kya Tampon Use Karne Se Virginity Jaa Sakti Hai?

How to use Tampon

Tampons ke use par aksar hymen stretch ho jaata hai. Lekin kyonki virginity ka matlab hai kabhi bhi physical naa hona toh aise mein tampon ka bhala virginity se kya connection hua? Agar tum physical nahi hue ho toh fir tum virgin hi ho, chahe pad use karo ya tampon!

Conclusion:

Tampons ek bahot hi common sanitary product hai. Ye chhote hote hain aur kaii saare activities karte samay comfortable rehte hain, jaise swimming, exercise vagairah. Aur yaad rakhna, tampons tab tak safe hote hain jab tak tum inhe har 4 se 8 ghanton ke andar change karti raho.

Ek Lady Doctor tumhari health se jude har sawaal ka jawab binaa kisii jhijhak ke de saktii hai. Ya fir tum Bol Behen pe bhi pooch sakti ho!

Chhaa Jaa ke saath bane rehne ke liye humein follow karein:

Instagram - https://www.instagram.com/chhaajaa/

Facebook - https://www.facebook.com/chhaajaa

Youtube - https://www.youtube.com/c/ChhaaJaa

Facebook Only Girls Group - https://www.facebook.com/groups/667075420473392

Bak Bak Gang Instagram - https://www.instagram.com/bak_bak_gang/

References
https://www.stayfree.in/what-is-tampon-and-how-to-use
https://www.fda.gov/consumers/consumer-updates/facts-tampons-and-how-use-them-safely
https://www.plannedparenthood.org/learn/health-and-wellness/menstruation/how-do-i-use-tampons-pads-and-menstrual-cups