Reasons For late Period [Periods Late Aane Ke Kya Kaaran Hain?]

“Mujhe 13 saal ki age se periods ho rahe hain. Par pichle kuch mahino se woh bahot late hone lage hain. Aur main ek ladke ke sath relationship mein bhi hoon. Har mahine jab periods late hote hain toh mujhe kaafi tension hone lagti hai. Aisa kyon ho raha hai?”

18 years old, Meerut

Hi!

Sabse pehle to hum par trust kar ke, humse ye private sawaal poochne ke liye bahot bahot thank you! Tum kaafi brave ho jo tumne apni life ki steering wheel ko apne haathon mein liya. Toh chalo ab hum tumhare sawaalon ke jawaab batate hain.

Sabse pehle toh hum jaan lete hain ki late periods kya hote hain? Dekho periods ka ek monthly yaani har mahine ka cycle hota hai, aksar woh lag-bhag har 28 se 35 din pe hote hain. Toh maan lo tumhein last periods 5 January 2022 ko hue toh agle mahine tumhein woh 2 se 10 February ke beech mein ho sakte hain. Par yeh sab tumhari cycle pe hi depend karega. Agar periods iss ek week kebaad hote hain toh usse hum late periods kehte hain. Par kya tumhein is baat ki chinta karni chahiye?

Periods late aane ke kai reasons ho sakte hain, par tumhare case mein blooding late kyon ho rahi hain yeh jaanne ke liye tumhein ek lady doctor se consult karna chahiye. Hum samajhte hain unse baat karna thoda awkward ho sakta hai par woh tumhari problem ko samjhegi aur tumhein sahi salah bhi dengi.

Periods Late Aane Ke Reasons

Periods ya booding late aane ke kai saare kaaran ho sakte hain. Aur woh har age ke sath badalte rehte hain. Teenagers jo 13 se 19 saal tak hote hain us waqt shareer mein bahot saare badlaav ho rahe hote hain. Humare hormones mein changes hote hain jiska assar periods par bhi hota hai. Agar tumhare periods 2 ya 4 din late hote hain toh chinta ki baat nahi hai. Par agar tumhare periods kaafi zyada late hote hain ya beech beech mein miss ho jaate hain toh uske peeche ye kaaran ho sakte hain:-

Stress

Tumhein shayad pata bhi nahi chalega par roz ka stress tumhare shareer par bahot assar karta hai. Stress aisi hi kayi baaton ki wajah se ho sakta hai jaise -

Padhai
Exams
Boyfriend se breakup
Gharwalo se ladai

Emergency contraceptive pill ka use

Agar tum relationship mein ho aur tumne 72 hours waali pill yaani emergency contraceptive pill ka use kiya hai toh tumhare agle periods late ho sakte hain, par kabhi kabhi pills lene se blooding jaldi bhi aa sakte hain. Emergency contraceptive pills mein hormones hote hain (progestin aur estrogen) jo pregnancy ko hone se rokte hai aur blooding cycle ko late ya jaldi kar dete hai.

PCOS/PCOD

PCOS ki condition mein humari body mein androgen naam ke hormone bahot zyada matra mein banati hain aur humari ovaries mein bhi fluid bhar jaati hain jiski wajah se ovaries egg release nahi kar paati aur iski wajah se blooding irregular hote hain. PCOS ke kuch symptoms yeh hain:

PCOS mein aksar chehre pe daane aur muhaanse aane lagte hai
PCOS mein shareer aur chehre pe bahot zyaada baal aane lagte hai
PCOS/PCOD mein baal bhi zyaada jhadne lagte hai
Iss condition mein achanak se weight gain hojata hai aur weight kamm karne mein takleef hoti hai
PCOS mein periods ke dauraan bahot zyaada dard hona

Agar tumhein bhi in mein se koi symptoms hain toh tum ek lady doctor se consult karo. Ab toh tum lady doctor se online baat bhi kar sakti ho!

Thyroid

Thyroid ek aur tarah ka hormone hai jo tumhare periods par assar daalta hai. Agar yeh hormone body mein bahot zyada ban jata hai toh usse hum medical terms mein hyperthyroidism kehte hain aur aagar ye zaroorat se kamm banta hai toh usse hypothyroidism kehte hain. Inn dono hi situations mein blooding cycle mein afarak padta hai

Pregnancy

Agar tumhara boyfriend hai aur tum physical hue ho toh pregnancy ek aur kaaran hai tumhare periods late hone ka. Par ghabrao nahi. Yeh confirm karne ke liye tum ek pregnancy test kar sakti ho. Aur agar tum sexually active nahi ho toh chinta ki koi baat nahi.

Unchahi pregnancy rokne ke liye humesha contraceptives yaani garbh nirodh ka istemaal karna. Yeh tumhein sirf pregnancy se hi nahi balki aur kai tarah ke STIs/STDs se bachayega. Tum lady doctor se bhi jaan sakti ho pregnant na hone ke tareekein.

Yeh kuch kaaran hain jinki wajah se tumhare periods late ho sakte hain. Isilye tumhein apna khayal rakhna zaroori hai. Tum kya khaati ho, kitna exercise karti ho aur kitna stress leti ho, ye sab baatein tumhare periods pe assar daalti hain. Aisa na ho uske liye humesha ek achi lady doctor se consult karna chahiye. Woh tumhare problems ka sahi solution batayengi jisse late periods ki pareshaani khatam ho sakti hai!

Aur yaad rakhna ki hum humesha tumhare saath hain. Koi bhi pareshaani ho, hum saath mil kar usko thik kar sakte hain. Kyonki Chhaa Jaa ke saath no sharmana, no ghabrana!

Chhaa Jaa ke saath bane rehne ke liye humein follow karein:

Instagram - https://www.instagram.com/chhaajaa/

Facebook - https://www.facebook.com/chhaajaa

Youtube - https://www.youtube.com/results?search_query=chhaa+jaa

Aur humara girls only facebook group join karna matt bhoolna, jahan full on friends ke saath har time bakbak chalti rehti hai - https://www.facebook.com/groups/667075420473392

Sources:

Why Is My Period Late?.

How Late Can a Period Be? When to Be Concerned

10 Reasons for a Missed Period

Why Is My Period Late?