Virginity Kya Hoti Hai?

Virginity ek society ka banaaya hua concept hai. Virgin un logon ko kehte hain jo kabhi physical nahi hue ho - chaahe boys ya girls ya koi aur. Aur kabhi physical naa hone waale is state ko virginity kehte hain. Toh chalo aaj hum virginity se judi kuch aur baatein jaanate hain.

Kya Sex Ke Baad Dobara Virgin Ho Sakte Hain?

Kyonki virginity ka matlab hi hai ki kabhi physical naa hue, toh ye obvious hai ki ek insaan sex ke baad dobara virgin nahi bann sakta hai.

Virginity Ka Koi Test Hota Hai?

Sach ye hai ki boys and girls dono hi virgin ho sakte hain but society mein girls ki virginity ko hymen se connect kiya jaata hai. Aur hymen ke hone ya na hone par virginity judge ki jaati hai, virginity ke tests ke baare mein jaanane se pehle chalo hymen kya hota hai ye jaanate hain.

Hymen ek patli jhilli yaani membrane hoti hai jo humaari vagina ke entrance pe hoti hai. Kaafi girls mein ye hymen first time sex ke dauraan fatt jaati hai. Lekin hymen sex ke alava kai saari doosri physical activities, jaise exercise aur cycling, ke kaaran bhi fatt sakti hai. Aur toh aur sab girls mein hymen ho hi ye bilkul zaroori nahi, kuch girls bina hymen ke hi born hoti hain. Issi ke saath kai logon mein hymen itni lachili hoti hai ki physical hone ke baad bhi poori tarah se fat-ti nahi hai. Isi kaaran scientifically virginity aur hymen ke beech mein koi relation nahi hai. Ye sirf society ka banaaya hua ek khel hai.

Virginity Test kaise kiya jaata hai?

Virginity test us test ko kaha jaata hai jismein doctors vagina aur hymen check karke virginity ke baare mein bataate hain. Lekin ye tests highly unethical aur unscientific hote hain.

Jaisa ki humne upar bataaya - hymen hone ya naa hone ka kisi ke physical hone ya nahi hone se koi relation nahi hai. Toh aise mein koi bhi doctor 100% sahi sahi ye nahi bata sakta ki koi physical hua hai ya nahi.

Virginity tests ka ek example hai ‘two-finger test’. Two-finger test ek aisa test hai jismein vagina ke muscles ki laxity yaani lacheelapan fingers ke zariye check kartehain. Two-finger test unethical hone ke saath saath ek illegal test bhi hai.

Hymen aur virginity completely unrelated hai. Aur kyonki hymen first time sex ke alava bhi kai saare reasons ki vajah se phatt sakti hai, isliye doctors bhi koi bhi ek valid virginity test conduct nahi kar sakte hain.

Agar tumhe virginity ya apne sexual health se jude kisi bhi sawaal ka jawab chahiye, toh tum nischint hokar apne lady doctor se consult kar sakti ho. Lady doctors, ya gynaecologists, tumhari har female reproductive health se jude sawaalon ka jawab bina kisi judgement ke de sakti hain.

Chhaa Jaa ke saath bane rehne ke liye humein follow karein:

Instagram - https://www.instagram.com/chhaajaa/

Facebook - https://www.facebook.com/chhaajaa

Youtube - https://www.youtube.com/c/ChhaaJaa

Aur humara girls only facebook group join karna matt bhoolna, jahan full on friends ke saath har time bakbak chalti rehti hai - https://www.facebook.com/groups/667075420473392

Sources:

What Is Virginity & The Hymen? | Losing Your Virginity

Can you regain your virginity after having sex?

Is my daughter still a virgin? Can you, please, check it, doctor? - PMC