Apne Private Parts Ko Clean Aur Healthy Rakh Ke Unka Khayal Kaise Rakhe?
Mere private parts se safed paani nikalta hai aur kabhi kabhi itching bhi hoti hai. Maine intimate wash bhi use kiye but unse bhi safed paani nikalna band nahi hua. Mummy aur friends se baat share karne mein sharam aati hai.
Main soch rahi hu kisi online lady doctor ko dikhaaun, par ghar par kya kahungi. Samajh nahi aa raha kya karun. Aap kuch suggest kar sakte ho?
-- 19 years old girl, Jaipur
Hello!
Sabse pahle toh humein apna sawaal bhejne ke liye aur humpe trust karne ke liye bade waala thank you!
Tum toh jaanti hi ho ki apne privates parts aur unki health ke baarein mein khul kar baat karna kitna uncomfortable aur scary ho sakta hai, aur is hi ghabrahat aur sharam ki wajah se hum aksar apni problems share nahi kar pate aur unka solution nahi dhund paate.
Apni private problems ke baare mein khul ke naa baat karne se aur unka solution timely na dhundhe se ham apne aap ko aur apni health ko khatre mein daalte hain.
Lekin tumne in sab ke baad bhi hum pe trust karke apni problem share ki, isliye thank you!
Ab baat karte hain tumhare sawaal ki, apne private parts ko healthy aur clean rakhna bahut important hai kyuki ek acchi aur healthy life jeene ke liye zaroori hai ki hamaare private parts aur reproductive system bhi healthy rahein.
Apne private parts ka khayal rakhna bahot easy hai aur ham is blog mein tumhein saari information detail mein aur acche se batayenge. Agar tumhe lagta hai ki tum koi bhi vaginal health se related problem face kar rahi ho jaise ki abnormal discharge, itching ya irregular periods toh tumhe ek lady doctor se consult karna chahiye.
Ek online lady doctor ya lady gynecologist se consult kar ke tumhari problem solve bhi ho jayegi aur health bhi better ho jayegi. Ladies problem doctor woh experts hain jo tumhein tumhaari problems ke sahi solution bhi denge aur tumhare beech hui baat ko tumhare beech hi rakhenge. Manne tumhari problem bhi solve ho jayegi aur kisi ko pata bhi nahi chalega.
Private parts ki health acchi naa hone ke signs:
Ab baat karte hai private parts healthy nahi hone ke signs ke baarein mein kyon ki problem ko solve karne se pehle uske baare mein information hona zaroori hai.
- Redness aur itching
- Discharge ka colour change hona aur smell aana
- Sex ke time pain feel karna
- Irregular periods hona
- Private parts par gaanth hona
Ye sab signs tumhari vaginal health kharab hone ke hain, kai problems infections, STI aur vagina ko clean na rakhne ki wajah se ho sakte hain. Aksar “feminine products” jaise intimate wash, cream ya oil use karne se bhi redness aur itching jaise issues ho sakte hai.
Agar tum in mein se koi bhi problem face kar rahe ho toh jald se jald ek lady gynecologist se consult karo, kyon ki agar ye issues timely treat nahi kiye toh tumhari health aur kharab ho sakti hai.
Private parts ka khayal kaise rakhe?
Vagina apne aap ko khud clean karti hai isiliye vagina naturally healthy aur clean rakhne ke liye white discharge nikalta hai, kitni amazing baat, hai na?
Hamari body humein safe rakhne ke liye kitna kuch karti hai aur humein bhi apni body ko is natural cleaning process ke liye appreciate karna chahiye!
Ab jab hamari body itna kuch kar rahi hai toh humein bhi iski help toh karni chahiye na? Toh ab baat karte hai kuch steps ki jo humein follow karne chahiye apne private parts ko healthy aur clean rakhne ke liye:
Private parts ko clean rakhna
Ye toh humne bata diya ki vagina self cleaning hoti hai, matlab ki woh khud apne aap ko naturally healthy aur clean rakhti hai.
Par ye hota kaise hai?
Humaari body white discharge ya safed paani release karti hai humaare private parts se jo humaare vagina ko naturally clean rakhta hai, is white discharge mein dead cells hote hai jo body khud ko healthy maintain karne ke liye nikal deti hai.
Isi natural process ki wajah se tumhein “intimate washes” ki zaroorat nahi hai, tum apne private parts ko lukewarm yaani kose paani aur mild unscented soap se bhi clean kar sakti ho.
Cotton underwear use karna
Cotton ek breathable fabric hai jo tumhare private parts ko comfortable feel karwayega, nylon aur silk fabric aksar sweat ko rok kar rakhte hain aur is geelepan ki wajah se infections, rashes aur bacteria ho sakte hain. Cotton tumhare private parts ko dry rakhta hai aur sweat ko trap nahi karta, isiliye undergarments hamesha cotton ke pehen-ne chahiye.
Healthy diet lena
Ek healthy diet bahut bada role play karti hai acchi vaginal health ke liye. Balanced diet lena, bahot spicy, acidic aur oily khana avoid karne se vagina healthy rehti hai , agar tum woh food khaogi jo zyada nutritious ho jaise ki fruits, dahi, green vegetables, woh tumhare vagina mein healthy bacterias increase honge aur tumhari health bhi improve hogi.
Safe sex practice karna
Hamesha safe sex practice karna bahot hi important hai kyuki unrotected sex se sexually transmitted infections (STIs) ho sakte hain. Infections jaise herpes, warts, syphilis humaari vaginal health ko kharab kar dete hain aur overall health ko bhi risk mein daal dete hain. Contraceptive (jaise condom) ko use karna sex ke time tumhein STIs, infections aur unchahi preganancy se safe rakhega.
Lekin condom use karne se pehle ye jaana-na important hai ki tumhein latex allergy toh nahi hai. Latex condoms commonly available hai aur agar tumhein latex se allergy hai toh tum non latex condoms ka bhi use kar sakti ho.
HPV vaccinations
Human papillomavirus (HPV) vaccines woh vaccines hai jo kuch tareeke ke viruses se tumhein protect karti hai. Yeh vaccines tumhe 9 tareeke ke HPV aur cervical cancer se bacha sakti hai. Iss vaccine ke teen doses hote hain aur tumhein yeh vaccine ek lady doctor se consult karke apne first time se pehle leni chahiye.
Exercise karna
Regular exercise humari overall health k liye achcha hota hai - ye baat hum sab ko pata hai, par regular exercises se humaari vaginal health bhi better hoti hai. Kuch exercises jaise squats humaare vaginal muscles ko strong banaati hain aur hamari reproductive health ka khayal rakhti hain.
Zaroori nahi hai ki exercise roz ek ghanta hi karein. Agar tum din mein 30 minutes apne workout k liye nikaal lo, woh kaafi hai tumhein physically aur mentally healthy rakhne k liye.
Humaari vaginal health ka accha hona humaari overall health ke liye bahut important hai, agar tum apni vaginal health ko lekar concerned ho aur kisi professional se baat karna chaahti ho toh bina kisi darr ke ek lady doctor se consult karo.
Haan, hum jaante hain lady doctor se baat karna thoda scary zaroor lagta hai aur khul ke apne private problems ke baare mein baat karna mushkil hai but hum bhi toh brave ladkiyaan hain!
Hum jab tak ek professional online lady doctor se consult nahi karenge tab tak hamari problem solve nahi hogi. Toh ab apne private health concerns online lady doctor se pucho apni private problems ka solution paane ke liye aur yaad rakhna Chhaa Jaa ke sath no sharmana aur no ghabrana!
