Kya Emergency Contraceptive Pills Ko Regularly Use Kar Sakte Hain Pregnancy Se Bachne Ke Liye?
" Maine emergency contraceptive pills ke baare mein bahot kuch suna hai, uske kuch side effects bhi hote hai. Mujhe bhi kaafi darr lagta hai unhe use karne se. Maine suna toh hain ki ye pills pregnancy se bachne ke liye help karte hain. Lekin kya emergency contraceptive pills ko regularly use kar sakte hain pregnancy se bachne ke liye?"
- 19 years old, Muzaffarpur
Hi!
Sabse pehle toh thank you! Tumne hum par trust karke apna itna personal sawaal poochne ke liye.
Tum to jaanti ho emergency contraceptive pills ko lekar kaafi galat information humare paas hain. Aur in cheezon pe baat kiye bina iska sahi istemal aur iske doubts clear karna kaafi muskil hain.
Par hum par trust karke apne doubt share karne ke liye tumhe bada wala thank you!
Ab baat karte hain tumhare sawal ke baare mein, toh emergency contraceptive pills ka matalab hi hain emergency mein use karna. Aur safe sex hum sab ke liye bahot zaroori hain taaki hum unwanted pregnancy aur STI’s/STD’s jaisi beemariyo se bacch sake.
In cheezon se related baat tum kisi bhi lady doctor se consult kar sakti ho kyonki ek professional hi tumhe sahi information, de kar tumhare saare doubts clear karti hain.
Dekho humare sexual health bhi humari overall bodily health se judi hui hain. Safe sex sirf pregnancy ke liye nahi balki infections se bhi related hain. Apni health ke liye jaise hum professional doctor ke paas jate hain waise hi humein ek gynaecologist ya lady doctor ke paas bhi jana chahiye.
Emergency contraceptive pills kya hoti hain?
Emergency contraceptive pills ek aisi medicine hain jo unprotected sex ke bad unchahi pregnancy se bachne ke liye li jaati hain. Issey hum morning-after pill ke naam se bhi jante hain. Iss pill ko humein unprotected sex ke 120 ghante (5 din) se pehle kha lena chahiye tabhi ye asar karta hain aur kuch pills ko humein 72 ghante (3 din) ke andar le lena chahiye. Jitni jaldi isse hum use karenge utna affective hoga.
Humari sexual life humare life se judi hui hain, aksar hum ise nazarandaz kar dete hain aur iske burre consequences humein jhelne padhte hain. Safe sex humein unchahi pregnancy ke saath saath STI’s aur STD’s jaise ki HIV hone se bachata hain. Sabse jaruri humein ye unchahe pregnancy aur kitne sare STIs se bachata hain. Emergency contraceptive pills toh humein bas pregnancy se baccha sakta hain lekin jo infections ya beemariyan hain unse ye pills nahi bacha sakte.
Unchahi pregnancy se bacchne ke bahot sare tareeke hain. Ye tum par depend karta hain tum konsa method apnate hain. Tum koi bhi method use kar sakti ho apni comfort ke according aur inka tumhari body pe koi bhi harmful effect nahi hoga.
Pregnancy se bachne ke different method:
Condom
Sabse pehla aur sabse important method safe sex ke liye ek condom hain. Condom naa sirf pregnancy se bachata hain balki aur bhi bahot sari STIs se bhi bachata hain. Male and female dono ke condoms aate hain ye couple pe depend karta hain ki wo konsa use
karna chahte hain. Ye sabse easy aur sabse effective method hain. Ise bas use karte waqt ye dhyan rakhna hain ki ye kahi se kate ya fate na. Condom latex se bane hote hain aur kuch log latex se allergic hote hain to is bat ka khaas khyal rakhe, aur agar tumhe ya tumhare partner ko latex se allergy hain toh non latex condoms ka use karein.
Birth control pills
Birth control pills ko 2 tareeko se le sakte hain. In pills mein thode amount mein hormones rehte hain, jo ovulation (egg ko ovary mein jaane se) ko rokte hain aur kuch pills uterus ki inner lines ko bhi change karte hain, jissey baby implant naa ho. Birth control pills 28 din ke pack mein aate hain aur har roz ek medicine lene hote hain, lekin ye pills tumhe STI’s aur STD’s se nahi baccha sakte.
Contraceptive injection
Contraceptive injection ek aisa injection hain jiss se lekar tum unchahi pregnancy se bacch sakte ho. Ye injection mein artificial hormone hote hain (progesterone) jo dheere dheere body mein injection through enter karke pregnant hone ke chances kamm kar dete hain. Ye injection har 3 mahine mein ek baar lena hota hain.
Diaphragm
Diaphragm ek soft silicone se bana chhota dome shape ka device hota hain, jo vagina ke andar daal kar sperm ki entry rokta hain. Ye female condom jaisa hi hain but iska shape aur use alag hain. Ise sex karne ke 6 ghante baad aur 24 ghante se pehle nikaal kar saaf karna chahiye taaki ye hygienic rahe. Diaphragm unchahi pregnancy toh rok sakta hain, par STI’s aur STD’s se protection nahi deta.
Emergency contraceptive pills regular kyu nahi use karna chahiye?
Emergency contraceptive pills ke baare mein humne bataya ki ye pills aise hormones body mein create karte hain, jo ovulation ko delay karne mein help karti hain. Jab egg ovulate hone ke process mein ho to ye medicine usse delay karegi, aur woh obviously menstrual cycle ko affect karegi hi aur regular use karne se aapke menstrual cycle bhi irregular hone lagenge. Aapke periods 1 week ya 2 week late aayenge lekin agar usse zyada delay ho to pregnancy test lena zaroori hain. Isliye in pills ka regular use nahi karna chahiye.
Hum sab jaante hain ki humari body ek jaisi nahi hoti, har insaan ki body different hain aur waise hi medicine ka affect bhi kuch logo ke liye helpful hota hain aur kuch logo ko uske side effects bhi hote hain. Waise hi emergency contraceptive pills lene ke baad kuch-kuch log side effects fce karte hain, jaise ki : nausea (mann machalna), vomiting, sar dard, thakawat, chakkar aana, periods ke beech mein heavy bleeding hona, body mein pain ye sab agar aap medicine lene ke bad turant feel kar rahe to ye normal nahi hain, turant hi aapko ek lady doctor ya online lady doctor se consult karna chahiye.
Apni sexual aur physical health ka khyaal tum nahi rakhogi, toh aur kaun rakhega. Mann mein koi bhi doubt ho emergency contraceptive pills ya contraceptive methods ko lekar toh seedha eki lady doctor ya fir online lady doctor se easily consult kar sakti ho. Safe sex sirf sexual health hi nahi balki physical aur mental health se bhi juda hain, apna khyaal sirf tum rakh sakti ho aur koi nahi, aur is safar mein hum tumhare saath hain!
Yaad rakho, problem hote hi ek lady doctor se bina kisi hichkichahat ke sexual health se judi kisi bhi problem ke liye consult karna chahiye. Ye specialist tumhari problems ka sahi solution bhi denge aur toh aur tumhari private baatein private bhi rahengi. Agar tum bhi emergency contraceptive pills ke side effects ya problems experience kar rahi ho toh jald ek lady doctor se consult karo. Aur yaad rakhna Chhaa Jaa ke sath no sharmana, no ghabrana!
References:
9 types of contraception you can use to prevent pregnancy (with pictures!)
Emergency Contraception (for Teens) - Nemours KidsHealth
Emergency Contraception: Side Effects of Ella and other Morning After Pills
https://www.healthline.com/health/emergency-contraception/possible-side-effects#takeaway
