Lady Doctor Ke Saath Conversation Kaise Shuru Karein?

“Main bahot time se ek ladke ke saath relationship mein hoon. Pichle kuch mahino mein hum physical hue hain. Uski wajah se meri body mein kuch changes aa rahe hain aur mujhe ek lady doctor se milna hai. Par mujhe lady doctor se baat karne mein sharam aati hai. Please meri help kijiye.”

19 years old, Bahadurgarh

Hello!

Sabse pehle toh hum par trust karke apna itna personal sawaal poochne ke liye thank you! Lady doctor se consult karna ek bahot bada step hai aur humein bahot khushi hai ki tumne ek lady doctor se baat karne ka decision liya.

Hum sab ladkiyo ke liye ek lady doctor se pehli baar baat karna bahot hi awkward hota hai, hum sab apni personal problems share karne mein jhijhakte hain. Lekin ye experience har ladki ki life mein aata hi hai, isiliye humein bina kisi hichak ke madad maangni chahiye.

But tumhare sawaal ka jawaab dene se pehle yeh jaan lete hai ki lady doctor se consult karna zaroori kyun hain? Aksar hum apni personal problems jese ki period wali wali problems, abnormal discharge ya garbh nirodh doosre doctors ke saath share karne mein uncomfortable mehsus karte hain par ek lady doctor woh professional hai jo tumhari problems ko samjhengi aur bina kisi judgement ke tumhari problem ka sahi solution bhi degi.

Aur toh aur lady doctors se jo bhi baat hum share karte hain woh humesha confidential yaani humare aur lady doctor ke beech mein rehti hain. Toh aise mein problem ka solution bhi mil jayega aur kisi ko pata bhi nahi chalega!

Accha, ab baat karte hai ki ek lady doctor se pehli baar milne par kya kya hota hai?

Sabse pehle toh lady doctor hum se sawaal poochne se pehle humein comfortable feel karayegi. Jab unhe lagega ki hum unse khul kar baat kar paa rahe hai, tab woh humse kuch personal sawaal poochengi jaise ki:

Last periods kab hue the?
Kitne dino tak periods hote hain?
Last physical relationship kab tha? Waghera waghera.

Lady Doctor Ke Saath Conversation Kaise Shuru Karein?

Lady doctor ke paas jaane se pehle, hum suggest karenge ki tum apni problems ke baare mein socho aur woh saare sawaal likh lo taaki tumhein yaad rahe ki tumhe kya kya poochna hai. Aisa karne se tum khud ko mentally ready kar paaogi aur koi baat bhoologi bhi nahi. Aur haan, agar tum lady doctor ke paas nahi jaa sakti, toh kyon na lady doctor se online hi consult kiya jaaye?

Kuch bhi bataane se pehle, tum unhe yeh bata sakti ho ki tum unse baat karne mein thoda nervous feel kar rahi ho. Jaise ki agar lady doctor tum se ye pooche ki tum kaisi ho toh tum ye bol sakti ho ki, “Main acchi hoon, par aapse baat karne mein thoda ghabra rahi hoon.” Lady doctor phir tumhein sabse pehle comfortable feel karwayegi aur tumhari help karengi taaki tum aaram se unse apni baatein share kar sako.

Kuch baatein jinke liye hum sab ko ek lady doctor se consult karna chahiye:

Aksar hum sab ko aisa lagta hai ki lady doctor ke pass sirf pregnant ladies jaati hain toh ye galat hai. Lady doctor ke pass jaane ke liye kisi ladki ka pregnant hona zaroori nahi hai, periods wali problems ya apne private parts se judi problems ke liye bhi lady doctor se consult kar sakte hain. Aise hi kuch reasons hain:

Periods wali problems

Jaise ki periods ka late hona ya kisi mahine periods miss hona, physical relationship ke

baad periods mein problem hona ya PCOD ke symptoms hona- in sab ke liye hum ek acchi lady doctor se consult kar sakte hain.

Breasts mein gaanth mehsoos hona

Apne breasts ka regularly ghar pe check-up karna bahot zaroori hai. Agar breasts mein gaanth mehsoos ho rahi hai toh jald se jald ek lady doctor se consult karna chahiye.

Abnormal discharge

Abnormal discharge aur normal discharge mein kya farak hota hai? Physical relationship ke baad agar abnormal discharge ho toh uska kya matlab hai? Periods ke alawa bhi regular discharge hota hai to usse kaise deal karein? Kya private parts mein se safed paani nikalna normal hai? Hum sab ke mann mein aise bahot se sawaal aate hain aur in sawaalo ka sahi jawaab ek expert yaani ki lady doctor hi de sakti hain.

STIs/STDs

STIs/STDs unprotected yaani bina condom sex ki wajah se ho sakte hain aur in beemariyon se bachne ke tareeke ek lady doctor hi bata sakti hai. Saath hi STI’s/STD’s ho jaaye toh sirf lady doctor hi sahi treatment de sakti hai.

Sex ke time par pain hona

Sex ke time par ajeeb lagna ya zyaada pain hona normal nahi hai. Agar aisa ho, toh jald hi ek lady doctor se consult karna chahiye.

HPV vaccines

HPV yaani ‘human papillomavirus’ wali vaccine humein kayi tarah ke infections aur saathi hi saath cervical cancer se bacha sakti hain. Is vaccine ko apne first-time physical hone se pehle lena best hai.

Pregnancy aur garbh nirodh/birth control

Unwanted pregnancy se kaise bach sakte hai aur contraception ke kaun se methods sabse safe aur effective hote hain, iski sahi jaankari ke liye tum ek online lady doctor se bhi consult kar sakti ho.

Apni health ka khayal ab hum khud nahi rakhenge, toh aur kaun rakhega? Hum samajhte hain ki kisi se khul kar apne private problems share karna aasaan nahi hain par hum hain naa! Har kadam pe tumhare saath, aur hum jaante hain ki tum bahot brave aur strong ho! Toh bass bina kisi hichkichahat ke khul kar apne sawaal humse aur lady doctor se poocho. Aur humesha yaad rakhna ki Chhaa Jaa ke saath no sharmana, no ghabrana!

Chhaa Jaa ke saath bane rehne ke liye humein follow karein:

Instagram - https://www.instagram.com/chhaajaa/

Facebook - https://www.facebook.com/chhaajaa

Youtube - https://www.youtube.com/results?search_query=chhaa+jaa

Aur humara girls only facebook group join karna matt bhoolna, jahan full on friends ke saath har time bakbak chalti rehti hai - https://www.facebook.com/groups/667075420473392

References:

4 Tips for Talking About Anything With Your Gynaecologist

7 Things You Should Always Discuss with Your Gynaecologist | Johns Hopkins Medicine

20 Questions I'm Too Embarrassed to Ask My Gynaecologist | Ochsner Health

10 Things You Should Always Discuss with Your Gynaecologist