Periods Mein, Pads Ke Jagah Kya Kuch Aur Istemaal Kiya Jaa Sakta Hain?

Ye menstrual cups kya hote hain? Maine apni didi ki dost ko ye bolte hue suna ki woh pads use karna bandh kar chuki hai aur ab menstrual cup ko use karti hai. Mujhe bada ajeeb sa laga ki pads ke alava bhi kuch hota hai jo hum periods ke dino mein use kar sakte hain? But ye exactly hota kya hai? Kya pads aur cups ke alava aur bhi koi cheez hoti hai jo hum periods ke liye use kar sakte hain? Aur in sab mein se best kya hai?

• 15 year old girl from Agra

Hello!

Sabse pehle toh humse apna bada hi personal aur interesting sawaal poochne ke liye shukriya!

Humein tumhari curiosity, tumhaari nayi nayi baaton ke baare mein jaanane ki chaah bahot hi pasand aayi, humesha aisi hi rehna! Ab baat karte hain tumhare sawaal ke baare mein: kya period mein pads ke alava bhi kuch use kar sakte hain? Ye jaanane ke liye aage iss blog ko padhti raho!

Periods Kyon Hote Hain?

Periods humaari body ka ek natural process hai. Ek age mein aane ke baad hormonal changes hone ki wajah se hi periods bhi shuru hote hain. Hormones ek tarah ke chemicals hote hain, jo humaari body ke different organs ko kya karna hai, kya nahi, iske liye message dete hain.

Humaari body mein do female hormones release hote hain - Estrogen aur Progesterone. In hormone ki wajah se uterus yaani garbhashay ki lining badhne lagti hai. Is lining ka kaam hota hai fertilized egg ko implantation ki jagah dena. Par jab egg fertilize nahi hota, tab ye lining toot toot kar blooding yaani periods ke form mein body se bahar nikal jaati hai. Aur ye cycle har mahine repeat hoti hai.

Ye peridos humaari body ki growth ka ek physical sign hote hain. Adhiktar teenage girl ke periods shuru mein thode irregular hote hain, par baad mein regular hone lagte hain.

Periods Ke Liye Kya Karna Chahiye?

Periods ke dino mein mentally prepare rehna zaroori hota hai. In dino mein kai baar lower abdomen yaani neeche ki taraf pet mein dard ya kamar ka dard feel hota hai, uske alawa humare mood mein bhi kai saare changes aate hain. Isiliye khud ka dhyaan rakhna bahot zaroori hota hai.

Apni menstrual cycle ko track karna ek accha step hai khud ko prepare karne ke liye, aisa karne se tumhare periods next kab aane wale hain tum ye guess kar paaogi aur apne period products jaise ki pads, cramps se rahat deni wali dawai aur baaki baaton ka dhyaan rakh paagoi.

Periods Mein Kya Istemaal Karna Chahiye?

Zyaadatar cases mein, periods ke time pe humein pads use karna sikhaya jaata hai. Lekin pads ke alawa bhi bahot se aise options hain jo apne apne comfort aur suhuliyat ke hisab se hum use kar sakte hain. In products ko try karke hi tum apne liye best option choose kar sakti ho.

Toh chalo pads ke alawa in 5 doosre products ke baare mein acche se jaante hain:

• Tampons

Tampons pads ki tarah hi blooding ko absorb karte hain, lekin tampons ko apne private parts ke andar daalna padta hai. Tampons ek tube ki shape mein hote hai aur unke end ke hisse mein ek string yaani dhaaga hota hai jisko kheech ke tum inko apne private parts se bahar nikal sakti ho. Kai tampons ek applicator ke saath aate hai jo insertion ki process ko easy kar deta hai.

Tampons ko har 4-6 ghante mein change karna hota hai. Tampons ko tum tissue paper ya newspaper mein wrap kar ke dustbin mein phenk sakti ho, par haan, inko kabhi flush nahi karna chahiye.

• Menstrual Cup

Menstrual cups ko bhi tampons ki tarah private parts ke andar daalna padta hai. Menstrual cup silicone ka bana hua ek flexible, chhota saa cup hota hai jo blooding ko absorb karne ki jagah usse ikkatha karta rehta hai aur leak nahi hone deta.

Menstrual cups eco-friendly hote hain aur ek cup lag-bhag 10 se 15 saal tak chalta hai. Ye cups reusable hote hain, iska matlab hai bass ek baar cup khareedo aur fir har periods ke time usse aaram se use karo. Haan, is mein hygiene ka dhyaan rakhna zaroori hota hai.

Cups ko use karne se pehle garam paani se sterilize karna zaroori hai. Aur cups ko har 6-8 ghante mein khaali karna bhi zaroori hai, cups ke end par bhi silicone ki bani hui ek string si hoti hai jisse kheech ke isko bahaar nikal sakte hain aur cup mein jo blood collect ho usko toilet mein giraa kar, cup ko saaf karke phir se use kar sakti ho.

• Menstrual Discs

Menstrual discs aur menstrual cups mein thodi similarity hoti hai, inhe bhi private parts ke andar insert karna padta hai aur ye bhi blood ko collect karti hain. Par menstrual discs menstrual cups se alag hote hain, woh disc ki shape mein hote hai, inko reuse nahi kar sakte aur har use ke baad inhe bhi pads aur tampons ki tarah phenkna hota hai.

• Period Underwear

Period underwear ek eco friendly aur washable period product hai jo tum ek normal underwear ki tarah pehen sakti ho. Period underwear absorbent material ke banne hote hai aur ye normal underwear ki tarah hi 1-2 saal tak chalte hai. Tumhein ek se zyaada period underwear lena padega taaki tum usse regularly change kar sako.

• Reusable Cloth Pads

Reusable cloth pads normal sanitary pads jaise hi hote hain, par tum inko wash karke dobara use kar sakti ho aur ye humare environment ke liye acche hote hain. Reusable cloth pads alag alag sizes mein aate hain, aur tum apne flow ke hisab se choose kar sakti ho ki konsa size tumhare liye better rahega. Reusable cloth pads ko bhi 2-6 ghante mein change karna zaroori hota hai.

Periods Mein Apne Liye Best Product Kaise Select Karein?

Ye choice tumhare par hai, tum in period products ko try karo aur decide karo, jo bhi option tumhein best aur comfortable lage tum usse choose kar sakti ho. Aur zaroori nahi hai ki sirf ek hi product use karo, tum situation aur need ki hisab se alag alag products use kar sakti ho. Tum ye teen points dhyaan mein rakh ke apne liye best option select kar sakti ho:

• Tumhara flow kaisa hai? Agar tumhara blooding ka flow bahot zyaada hai toh tum menstrual cups ya disc choose kar sakti ho.
• Time kya hai? Tum day coverage aur night coverage ke liye alag products use kar sakti ho jaise ki tampons ka istemaal din mein kar sakti ho aur menstrual cups ka raat mein.
• Tum kahan jaa rahi ho? Agar tum swimming karne ja rahi ho ya kisi party mein ja rahi ho toh tum tampons aur menstrual cups ka use kar sakti ho.

Conclusion

Agar tum sure nahi ho ki tumhein kaunsa product lena chahiye ya in products mein se kaunsa best hai, ya kisi ko use karne ka koi faayda ya nuksaan ho toh tum ek lady doctor se consult kar sakti ho.

Lady doctor tumhari problems samjhegi bhi aur tumhein sahi salah bhi dengi. Aur toh aur lady doctor se share kari gayi har baat tum dono ke beech hi rahegi, toh ab solution bhi mil jayega aur kisi ko kuch pata bhi nahi lagega.

Chhaa Jaa ke saath bane rehne ke liye humein follow karein:

Instagram - https://www.instagram.com/chhaajaa/

Facebook - https://www.facebook.com/chhaajaa

Youtube - https://www.youtube.com/results?search_query=chhaa+jaa

Aur humara girls only facebook group join karna matt bhoolna, jahan full on friends ke saath har time bakbak chalti rehti hai - https://www.facebook.com/groups/667075420473392

Sources

Tampons, Pads, and Other Period Supplies (for Teens) - Nemours KidsHealth

5 Alternative Menstrual Products to Tampons and Pads

5 Tampon Alternatives You Need to Know About | Glamour