Periods Kis Age Mein Shuru Hote Hain?

Periods Problems

Periods puberty ke aane par shuru hote hain. Ladkiyon mein puberty 8-13 saalon ke beech shuru ho jaati hai. Inhi ages ke dauraan periods start ho jaate hain. Kuch ladkiyon ke periods 12 saal ki age mein toh kissike 8 saal ki age mein bhi shuru ho sakte hain. Toh periods exactly kab shuru hone chahiye? Chalo jaanate hain.

Periods Kis Age Mein Shuru Hote Hain?

Usually ladkiyon ke periods sabse pehle 12 saal ki age mein shuru hote hain. Lekin zaroori nahi sabhi ladkiyon ki periods same hi age par shuru ho. Zyaadatar ladkiyon ka cycle 10 se 15 saal ki age ke beech mein kabhi bhi shuru ho sakta hai. Lekin phir ye bhi sirf ek average range hai. Kai saare cases mein ladkiyon ko 8 saal ya 16 saal ki age mein bhi first periods shuru hote hain.

Puberty body changes

Pehle Period Ke Liye Taiyyari Kaise Kare?

First period exactly kab aayega ye guess kar paana mushkil hai isiliye periods ke liye pehle se hi ready rehna accha idea hota hai. Halaanki first periods sabke liye thode uncomfortable hote hain, par agar koi girl periods shuru hone ki age range mein pahonch chuki ho toh chhote chhote steps leke khud ko ready karke first periods ke experience ko better kar sakte hain. Kuch steps jo aise mein lene chahiye:

  • Ek pad/tampon apne paas rakhna aur usse use kaise karte hain seekhna.
  • Bharosemand badon se baat karna jinke saath comfortable mehsoos ho.
  • Apne school mein pads aur tampons kaha mil sakte hain, iska acche se pata karke rakhna.
  • Aur sabse zaroori, curiosity ko roke na rakhna. Humaari curiosity knowledge gain karne mein sabse important part hoti hai. Isiliye, khulke apne sawaalon ko google par search karo ya apne kisi bharosemand bade se pooch lo.

Period cycle

Period Start Hone Ke Kya Signs Hain?

Periods kab shuru honge iska exact time toh guess karna mushkil hai par most cases mein, breast tissue ke develop hone ke 2 saal baad ya phir vaginal discharge shuru hone ke 6 mahine se 1 saal ke baad periods shuru ho jaate hain.

Kis Age Tak Period Naa Aaye Toh Lady Doctor Ko Dikhana Chahiye?

Humaare periods tab shuru hote hain jab humaari body ready ho jaati hai. Aksar ye 10 se 15 saal ke beech mein hota hai. Lekin kai baar kuch ladkiyon ka 16 saal tak bhi periods nahi hote hain. Ye kai saare factors ke kaaran ho sakta hai jaise weight kam hona, exercise adhik karna, stress hona, ya phir hormonal imbalance.

Aisi situation mein ek gynaecologist se consult kar lena achha hota hai taaki voh checkup karke hume sahi diagnosis de sake.

Chhaa Jaa ke saath bane rehne ke liye humein follow karein:

Instagram - https://www.instagram.com/chhaajaa/

Facebook - https://www.facebook.com/chhaajaa

Youtube - https://www.youtube.com/results?search_query=chhaa+jaa

Aur humara girls only facebook group join karna matt bhoolna, jahan full on friends ke saath har time bakbak chalti rehti hai - https://www.facebook.com/groups/667075420473392

Sources:

Starting your periods - NHS.

What Age Do Girls Get Their Period?