Mujhe Periods Mein Kam Flow Kyon Hota Hai? Kya Periods Mein Bahot Zyaada Flow Hona Chahiye?
“Mujhe jab periods pehli baar hue the tab se kuch saalon tak zyaada flow hota tha, lekin kuch samay se ab mere flow mein changes dikhai de rahe hain. Zyaada ke jagah kam flow hota hai, thodi tension bhi hoti hai mujhe, samajh nahi aata kisse apni baat share karu. Aisa kyon ho raha hai?”
- 19 years old girl, Dehradun
Hi!
Sabse pehle toh thank you hum par trust karne ke liye aur apna sawaal bejijhak poochne ke liye! Tumhaara ye sawaal bahot hi interesting hai! Aur humein tumhaari ye curiosity dekh kar khushi hui.
Agar tumhe ya tumhaare kissi bhi kareebi dost ko periods ke samay kam flow hota ho ya fir periods se jude kissi bhi problem ya sawaal ka jawaab chahiye ho toh tum lady doctor se baat kar sakti ho. Hum samajhte hain unse baat karna thoda awkward ho sakta hai par woh tumhari problem ko samjhengi aur tumhein sahi salah bhi dengi.
Internet pe kai log alag alag baatein karte hain, tum agar apni information internet pe search kar rahi ho toh dhyaan rakhna ki tum kisi credible yaani jaani pehchaani website dekhrahi ho, aur uske alawa tum bina kisi hichak ke ek online lady doctor se bhi baat kar sakti ho.
Toh chalo ab hum tumhare sawaal ka jawaab batate hain.
Periods Kyu Hote Hain?
Humaari body mein har badlav kisi wajah se hota hai, aur unmein se ek badlaav hai periods ya menstrual cycle. Harr mahine humaare ovaries mein se ek egg nikalta hai aur is process ko ovulation kehte hain. Issi samay hormonal badlaav humaare uterus ki lining ko thick karke pregnancy ke liye tayyar karte hain. Jab ovulation ke samay egg fertilise nahi hota toh uterus iss extra lining ko shed kar deta hai jo blooding ke roop mein body se bahaar nikal jaata hai. Ise hum period cycle kehte hain jo ki 2-7 dino tak chal sakta hai. Har ladki ke liye period cycle ki length alag ho sakti hai. Periods har 21 se 35 days ke andar aate hain.
Kya Period Mein Kam Flow Hona Koi Tension Ki Baat Hai?
Humare periods ka flow zyaadatar har mahine same rehta hai lekin kabhi kabhi flow kam ya zyaada bhi ho sakta hai. Flow mein kabhi kabhi change hona bahot normal hai. Kai factors aur changes ki vajah se blooding ka flow kam zyaada ho sakta hai jaise ki stress, lifestyle changes, medication, weight loss ya gain etc. Sabki bodies alag hoti hai aur sabhi ke menstrual cycles bhi ek doosre se alag hote hain isiliye apni dost ka aur apna flow compare karke tum darna mat.
Lekin agar tum irregular flow kaafi zyaada experience kar rahi ho toh ek lady doctor se check karvaana sahi rahega. Agar tumhe -
- Blooding 2 din se kam hoti hai
- Blooding 9 din se zyaada ho rahi hai
- Blooding ka flow bahot kam ya bahot heavy hai
- Ek se zyaada baar normal period flow nahi hua ho
- Tumhe 21 - 35 days ke alawa bhi thoda flow hua ho
Period flow kai baar doosre health reasons ki vajah se badal sakta hai. Isiliye zaroori hai tum gynaecologist se ek baar check karvaao. Voh tumhare period ke baare mein tumhe behatar guide kar paayengi aur tumhare flow change hone ka sahi kaaran bhi bata paayengi.
Periods Ka Flow Change Kyon Hota Hai?
Jaise ki humne upar baat ki, period flow sabhi ladkiyon mein alag hota hai aur kai baar kuch mahino mein humaare blooding ke flow mein badlaav hota hai aur yeh normal hai. Kai baar jaise hum bade hote jaate hain humaare period ka flow zyaada ya kam bhi ho sakta hai.
Irregular flow ke kuch reasons yeh ho sakte hain :
Stress
Stress humaari body ko fight ya flight state mein daal deta hai aur iss state mein lambe samay tak rehne se humaari body ke hormones par asar hota hai jo ki ovulation aur fir period pe asar daalta hai. Stress ko exercise aur lifestyle changes se manage kiya jaa sakta hai jisse humaare reproductive health par negative asar nahi padta.
Weight Loss Or Weight Gain
Yeh sach hai ki humare body weight aur body fat ke wajah se humaare period mein badlaav aa sakta hai. Jab body weight extremely kam ya zyaada hota hai, toh hormones sahi se kaam nahi karr paate, aur iss wajah se irregular periods ho sakte hain ya fir period flow band ho jaata hai.
72 Hours Waali Pill
Emergency contraceptive pills (ECP) jinhein hum 72 ghante waali pills ke naam se bhi jaante hain woh bhi tumhaare flow ko affect kar sakti hai. Toh agar tumne recently iss pill ko liya hai toh tum apne flow mein changes notice kar sakti ho. Par daro mat, kuch samay mein tumhara period flow normal ho jaayega.
PCOS/PCOD
PCOD ke wajah se, ovaries mein eggs mature hone band ho jaate hain. Issi kaaran body mein hormonal changes dikhte hain, jaise weight badhna, acne, weight loss mein problem hona, excessive hair growth etc. Aise mein lady doctor tumhe PCOD ko regulate karne ke tareeke batayengi jisse tumhare flow ko regulate hone mein madad hogi.
Periods Mein Kaisa Flow Hona Chahiye?
Jab humein pehli baar periods hote hain, toh kuch saalon tak woh cycle lamba hota hai. Jaise hum bade hone lagte hain vaise, flow kam ho jaata hai aur regular ho jaata hai. Period cycle ke har din ka flow bhi har mahine alag ho sakta hai, pet mein kabhi kabhi dard bhi mehsoos hoga aur kabhi nahi, flow kabhi zyaada din ke liye ya fir kam din ke liye bhi ho sakta hai, aur ye sab normal maana jaata hai.
Sirf jab birth control pill ya 72 hour wali pill istemaal karogi tab periods mein kaafi badlaav notice karogi.
Lady doctor woh professional hai jo tumhari reproductive health aur private parts ki health se related problems ko solve karti hain. Haan ek lady doctor se baat karna thoda mushkil lag sakta hai, kyonki apne personal problems ke baare mein khul kar baat karna uncomfortable ho sakta hai, but ye baat yaad rakhna zaroori hai ki ye professionals tumhari help karne ke liye hain.
Lady doctor tumhare har sawaal ka tumhein sahi jawab dengi chaahe woh sawaal sex se related ho ya periods se, woh tumhaari problem bhi samjhegi aur tumhare beech hui baat private bhi rakhengi. Aur yaad rakhna, Chhaa Jaa ke saath no sharmana, no ghabrana!
Chhaa Jaa ke saath bane rehne ke liye humein follow karein:
Fikar Not Webseries yaha dekhe - Fikar Not | Season 1 | Chhaa Jaa - YouTube
Instagram - Chhaa Jaa (@chhaajaa) • Instagram photos and videos
Facebook - Chhaa Jaa - Home | Facebook
Youtube - Chhaa Jaa
Tum hamare What’sApp ke chatbot se bhi apni body aur health se jude sawaal bhi pooch sakti ho - Bol Behen | What'sApp
Aur humara girls only Facebook group join karna matt bhoolna, jahan full on friends ke saath har time bakbak chalti rehti hai - Bak Bak Gang | Facebook
Sources:
Why Is My Period So Light?
Menstrual cycle: What's normal, what's not - Mayo Clinic
Light period: What it means, causes, and when to see a doctor
How Will the Morning-After Pill Affect My Menstrual Cycle? - Nurx™ ™
