As A Young Girl Main Self Care Kaise Kar Sakti Hoon?

Maine aaj kal social media pe aur apne friend circle mein bahot suna hai sabko “self-care” ke baare mein baat karte hue ki “self-care practice karna zaroori hai” ya “self-care pe dhyaan dena chahiye”, par ye self-care exactly kya hota hai? Aur main as a teenage girl self care kaise kar sakti hoon?

• A 16-year-old girl from Jodhpur

Hi!

Sabse pehle toh thank you humse apni thoughts aur sawaal share karne ke liye aur hum par trust karne ke liye! Achcha behen, jawab dene se pehle ek baat kehni thi tumse ki tum bahot hi brave ho aur ye jo tumhari curiosity hain na, usse kabhi nahi khona!

Tumne apna concern humaare saath share kiya, ye baat humein bahot achchi lagi. Hum ladkiyaan aksar apni personal baatein share karne mein katraati hain, lekin mushkil sawaal poochna hi toh self-care ka pehla step hai.

Jab tum khud ko jaanana chahti ho, apni body ko samajhna chahti ho aur khud ki care karna bahot important hai ek healthy life experience karne ke liye. Aur ek achchi aur healthy life par tumhara poora haq banta hain. Toh chalo baat karte hain ki ye self-care kya hai aur isko kaise practice kar sakte hain.

Self-care kya hota hai? Aur self-care important kyun hai?

Self-care ka matlab hota hai khud ka dhyaan rakhna. Self-care mein woh saari practices aati hain jo hum khud ko healthy rakhne ke liye follow karte hain, jaise ki hygiene, nutrition, aur sahi samay par lady doctor se consult karna. Lekin self-care sirf physical health tak limited nahi hai.

Hum sab apni body ka dhyaan healthy habits ke through rakh sakte hain, jaise ki balanced aur healthy diet lena, regular exercise karna, aur mentally bhi khud ko healthy rakh sakte hain meditation jaisi acchi health practices ko follow karke.

Ab baat karte hai ki self-care important kyon hai. Self-care practice karne se hum khud ke saath ek healthy relationship bana sakte hai jo ki humare baaki relations ko bhi healthy rakhega. Jab tum apni needs aur well-being pe dhyaan dogi, apna best version banne ke liye tab tum apne saath walo ke liye bhi best hogi.

Self-care kaise practice kare?

Self care practice karne ke kai saare tareeke hai, tum kaafi saari aisi cheezein kar sakti ho jo tumhari maansik aur sharirik health ke liye acchi ho, jaise ki:

Ek Acchi Lifestyle Follow Karo

Ek acchi lifestyle jeene ke liye tumhara apni health par dhyaan dena bahot zaroori hain. Kam se kam 30 minutes ki regular exercise karna bahot important hai, chahe woh walking ya jogging hi kyon na ho. Tumhein agar dance karna pasand hai toh tum dance bhi kar sakti ho, zaroori ye hai ki hum apni body ko move karein.

Exercise ke saath saath, ek acchi balanced diet lena bhi bahot zaroori hai. Ek balanced diet mein nutrients, vitamins aur minerals hote hai, jo humari body ko healthy rakhte hain. Fruits, vegetables aur protein jaise ki chicken ya paneer khane se humari body strong hoti hain.

Apni Body Se Jude Sawal Pucho Lady Doctor Se

Agar tumhein apni body se juda koi bhi sawaal ho, chahe woh periods se related ho ya tumhare private parts se, tum bejhijhak ek lady doctor se pooch sakti ho. Hum ladkiyan apne teenage years mein bahot sare changes se guzarti hai aur un changes ke baare mein sahi information humein ek lady doctor de sakti hai.

Ek lady doctor bina kisi judgement ke tumhari problem sunegi bhi aur tumhein us problem ka sahi solution bhi dengi. Toh bina kisi hichak ke tum ek lady doctor se baat kar sakti ho.

Humesha Safe Sex Practice Karo

Safe sex yaani ki sharirik sambandh banane ka woh tareeka jis mein sab se kamm risk ho STDs jaise ki HIV ya herpes hone ka. Safe sex tum aur tumhare partner ke beech communication aur trust improve karke tumhari sex life ko better bana sakta hai.

Safe sex halaanki unprotected sex kai zyaada healthy hota hai, par iska matlab yeh nahi ki ismein bilkul risk nahi hai.

Safe sex ka matlab hota hai har sexual encounter ke time protected sex karna.

• Oral sex ke waqt condom, dental dam, ya plastic wrap use karna
• Vaginal sex ke samay male ya female condom use karna
• Anal sex ke samay male ya female condom use karna
  

HPV Vaccine Lagwao Khud Ko Safe Rakhne Ke Liye

Zyaadatar cervical cancers human papillomavirus (HPV) se jude hote hain jo ek sexually transmitted infection hai. HPV vaccine ke widespread immunisation se cervical cancer aur HPV se jude doosre cancers ka impact kam ho sakta hai.

Unprotected sexual contact se HPV ke alag alag strains spread ho sakte hain jo cervical cancer cause kar sakte hain. HPV vaccine agar ladkiyon ko virus se exposure se pehle di jaaye toh cervical cancer ke kayi cases avoid kiye jaa sakte hain. Iss vaccine se ladkyion mein vaginal aur vulvar cancer, aur dono ladkiyon aur ladkon mein genital warts, anal cancers, aur mouth, throat, head, neck cancers bhi prevent kiye jaa sakte hain.

Theory mein vaise ladkon ko bhi agar cervical cancer se associated HPV types ki vaccine di jaaye toh isse virus ka ladkiyon tak transmission kam ho sakta hai.

Agar tumhe HPV ka ek strain already hai toh bhi yeh vaccine tumhe doosre strains se protect kar sakti hai. Lekin yeh vaccine existing HPV infection ko cure nahi kar sakti. Yeh sirf HPV ke kuch specific strains jisse tum expose nahi hui ho, usse tumhe protect kar sakti hai.

• Apne Private Parts Ko Clean Aur Healthy Rakho

Self care ka sabse important part hai apne private parts ko clean aur hygienic rakhna. Aur private parts ko clean rakhna kaafi easy process hai. Iske liye tumhe koi bhi extraordinary measure lene ki zaroorat nahi hai. Aao dekhte hain ki kaunse simple steps se tum apne private parts ko clean rakh sakti ho.

• In the shower

Vagina ek self cleaning organ hai. Regular days mein jo discharge tum notice karti hogi, voh ek indicator hai ki tumhara vagina bilkul theek tarah se kaam kar raha hai. Lekin vulva, jo humaare body ke bahar ki side par hota hai, self cleaning nahi hota. Isiliye nahate samay ise paani aur mild, fragrance free soap use karke apne haathon se saaf karna chahiye.

• After Going To The Bathroom

Washroom jaane ke baad har baar apne private parts ko clean karke dry karna bahot zaroori hai. Anus aur vagina ko hamesha separate tissue se saaf karo taaki infection avoid kar sako. Anus pe use kiya tissue kabhi bhi urethra ko dry karne ke liye use mat karna varna UTI infection ho sakta hai.

• After sex

Sex ke baad hamesha urinate karna zaroori hai. Sex ke samay agar koi bacteria migrate hue ho toh urination se voh nikal jaate hain aur isse urinary tract infection yaani ki UTI ka risk kam ho jaata hai. Tum thode paani se apne vulva ko bhi clean kar sakti ho lekin koi bhi internal washing and scrubbing karne ki zaroorat nahi hai.

• Grooming

Pubic hair bilkul normal hai. Haalaanki iske kuch biological purposes hain jaise ki sex ke daauran vulva ki delicate skin ko friction se protect karna, hygiene se iska koi relation ab tak dekha nahi gaya hai. Agar tum apne pubic hair ko trim ya poori tarah remove karna chahti ho toh voh tumhari choice hai. Important yeh hai ki tum pubic hair kaise remove karti ho.

Agar tum shave karti ho, toh humesha ek fresh blade use karo. Ya fir ek specific blade pubic hai removal ke liye rakho jo tum body pe kahin aur shave karne ke liye use naa karo. Shaving ke baad, razor ko achhe se dry karke, cupboard mein store karo taaki voh fungus ya rust se kharaab naa ho.

• Monitoring

Aur sabse important baat, apne vagina aur vulva ko observe karke usse familiar bano. Issise agar kabhi kuch unusual hua toh tum identify karke sahi time par lady doctor se consult karke use treat kar paaogi. Tumhare private parts normally kaise dikhte hain, smell ya feel hote hain, yeh observe karo. Isse kabhi kuch agar out of ordinary hua, toh tum usse jaldi se identify kar paaogi. Saath hi, doctor ke paas regular checkups ke liye jaati raho.

Conclusion:

As a young girl, self-care practices ko adopt karna bahot important hota hai. Isse tumhe inki aadat padegi aur tum apne private parts ko humesha clean, hygienic aur healthy rakh paaogi. Jaise skincare, haircare, bodycare important hai, vaise hi private parts ki care karna bhi important hai aur isse tumhe apne routine ka hissa banana chahiye aur unhe observe karte rehna chahiye. Aur agar kabhi kuch unusual lage toh turant apne lady doctor se jaake milo taaki voh time pe tumhari help kar sake.

Chhaa Jaa ke saath bane rehne ke liye humein follow karein:

Instagram - https://www.instagram.com/chhaajaa/

Facebook - https://www.facebook.com/chhaajaa

Youtube - https://www.youtube.com/c/ChhaaJaa

Aur humara girls only facebook group join karna matt bhoolna, jahan full on friends ke saath har time bakbak chalti rehti hai - https://www.facebook.com/groups/667075420473392

Sources:

Women's Health Information: Everything You Need to Know

Top 10 Basic Tips on Healthy Living for Women

Safe Sex: Prevent HIV and Other STDs

20 Feminine Hygiene Tips: Who It's for, Routines, Myths, More

Vulvar Care

HPV vaccine: Who needs it, how it works - Mayo Clinic