Period Ke Time Physical Hone Se Kya Hota Hai?

“ Mere kuch friends kehte hain ke periods ke dauran sex karne se periods mein kamm dard mehsoos hota hai. Lekin kuch friends kehte hain aisa kuch nahi hota.

Aur mujhe ye sunkar hi ajeeb sa lagta hai . Kya ye baat sahi hai aur is par yakeen karna chahiye? Online bhi alag alag baatein likhi hui hain kuch samajh nahi aa raha kya sachh hai aur kya nahi?

• 19 years old girl from Bilaspur

Hi!

Sabse pehle toh thank you hum par trust karne ke liye aur apna sawaal bejijhak poochne ke liye!

Tumhara ye sawaal bahot hi interesting hai! Aur humein tumhari ye curiosity dekh kar khush hui. Aksar blooding aur sex ke baare mein sawaal poochne se girls hesitate karti hain, phir bhi tumne apne personal doubts humaare saath share kiye, uske liye tumhein bade wala thank you!

Kya tum jaanti ho ki tum apne safe sex ya blooding se jude sawaal ek lady doctor ya online lady doctor ya gynecologist se bhi pooch sakti ho? Woh tumhari problems ka sahi solution tumhein dengi aur consultation ke dauran tumhare beech hui baatein private bhi rakhengi. Bahot saare log internet pe tumhein bahot alag alag tarah ki baatein bataayenge, lekin ek professional doctor hi tumhein sahi information de sakti hain.

Bas ek baat humesha yaad rakhna ki jabhi bhi sex ho woh safe ho. Humesha contraception jaise ki condoms ka istemaal karna bahot zaroori hai.

Ab baat karte tumhare sawaal ke baare mein.
Chhaa Jaa laaya hai sab kuch 🫰 mein. Apne phone se judo Doctor se aur pooch daalo saare sawaal. MediBuddy ke saath. Humaare coupon code ka use karo aur free mein Doctor se baat karo

Periods Ke Time Physical Hone Se Kya Hota Hai?

Dekha jaaye toh blooding ke time sex karne ke baare mein bahot saari misinformation aur myths hain. Har online website par har tareeke ki baatein hoti hain, humein dhyaan rakhna hai ki hum sirf unhi baatein par bharosa karein jo scientific fact ho aur safe sex ke baare mein bataaye.

Har kisi ke periods alag hote hain jaise ki humari ek saheli hai, Anjali, uske periods 7 din ke hote hain aur uska flow bahot hota hai aur utna hi pet mein dard bhi hota hai. Par humari ek aur friend hai Radhika jiske periods sirf 5 din hote hain aur usse zyada pet mein dard bhi nahi hota.

Aise hi kuch ladkiyon ke liye blooding ke time sex karne se unko periods mein pain mein relief milta hai. Toh chalo ab periods mein physical hone ke kuch faaydon ke baare mein bhi baat karte hain.

Periods Mein Physical Hone Ke Faayde

Kya blooding ke time sex karna safe hai? Aur kya un dino physical hone ke koi faayede hain? Chalo ab in sawaalon ke jawab jaanate hain.

Blooding ke time sex kar sakte hain lekin har baar safe sex practice karna zaroori hai. Safe sex yaani condoms ka use karna physical hote time bahot zaroori hai tumhare aur tumhare partner ke liye. Aisa karne se tum aur tumhara partner kisi bhi infection se bach sakte ho. Humne dekha hai ye myth rehti hai ki periods ke time physical hone se pregnancy ke chances nahi rehte hain lekin ye bilkul galat hai, isiliye humesha physical hote waqt condom ka use karna zaroori hai.

Ab baat karte hain periods ke waqt physical hone ke faaydon ke baare mein:

• Pain relief

Blooding ke time sex karne se cramps yaani pet mein dard se rahat mil sakti hai. Aksar orgasm aane ki wajah se dard kamm mehsoos hota hai. Humari body ke muscles mein jo stress hota hai, physical hone ke baad usse rahat milti hain. Sex ke waqt endorphin naam ka ek chemical humari body mein release hota hai, isi ki wajah se humare pet mein jo dard hota hai, woh kamm ho jaata hai.

• Kamm din periods hona

Aisa zaroori nahi hai ki periods kamm din hi ho, par physical hote time jab humein orgasm aata hai tab humaari muscles contract yaani sikudti hai tab humare private parts mein se blood aur cells jaldi nikal jaate hain aur periods kamm din hone ke chances badh jaate hain.

• Sar dard mein rahat

Agar tumhein sinus ya migraine ki problem hoti hai periods ke time par toh physical hone se woh bhi chali jaati hai. Ye bhi endorphin chemical ki wajah se hota hain kyonki woh dard kamm karne ka kaam karta hai.

Periods Ke Waqt Physical Hone Ke Problems

Periods ke time physical hone ke vaise in general bure effects nahi hain lekin sabse badi problem ho sakti hai ki yeh ek messy experience hai. Tumhare bedsheet ya kapdon pe blood lag sakta hai aur tum toh jaanti ho in stains ko nikaalna thoda mushkil hota hai. Humari salah hai ki periods mein physical hote waqt ek towel ya purana bedsheet use karo.

Periods Aur Safe Sex

Kuch bhi ho tum ye yaad rakho ki khud ko aur apne partner ko safe rakhna zaroori hai. Periods ke time bhi pregnant hone ke chances hote hain. Aisa hone ke chances kamm hain lekin zero nahi, isiliye condoms ka use karna bahot important hota hai. Aur toh aur, STD/STI , HIV, Herpes jaisi bimaariyon se bachne ke liye bhi periods ke time safe sex karna chahiye. Important hai ki hum inko dhyaan mein rakho aur condoms ka istemaal karo taaki , dono safe reh sako.

Conclusion:

Safe sex ki importance toh ab hum sab jaante hain, lekin kuch sawaalon ke jawab sirf ek professional yaani ek lady doctor hi tumhein de sakti hai. Tum kisi bhi lady doctor ya gynaecologist se consult kar sakti ho aur tumhein agar bahar jaane mein ya unke samne baith ke sawaal poochne mein hichkichahat ho rahi ho to tum ek online lady doctor se bhi consult kar sakti ho.

Yaad rakho, koi bhi sawaal ho, chaahe woh sex se related ho ya periods se, ek lady doctor se bina kisi sharam ke consult karna chahiye. Ye specialist humari problems ka sahi solution bhi denge aur toh aur humari private baatein private hi rakhenge. Aur yaad rakhna, Chhaa Jaa ke saath no sharmana, no ghabrana!

Chhaa Jaa ke saath bane rehne ke liye humein follow karein:
Fikar Not Webseries yaha dekhe - Fikar Not | Season 1 | Chhaa Jaa - YouTube

Instagram - Chhaa Jaa (@chhaajaa) • Instagram photos and videos

Facebook - Chhaa Jaa - Home | Facebook

Youtube - Chhaa Jaa

Tum hamare WhatsApp ke chatbot se bhi apni body aur health se jude sawaal bhi pooch sakti ho - Bol Behen | What'sApp

Aur humara girls only Facebook group join karna matt bhoolna, jahan full on friends ke saath har time bakbak chalti rehti hai - Bak Bak Gang | Facebook

Sources:

Tips for Having Sex During Your Period

Sex During Periods: Benefits, Side Effects, Pregnancy Risk, and Tips